Июнĕн 22-мĕшĕнче Патăрьел муниципалитет округĕн пуçлăхĕ Рудольф Селиванов Чăваш Республикин регион управленийĕн центрĕ (ЦУР) пулăшăвĕпе "Контактра" социаллă сетьре 15.00 сехетре тỹрĕ эфира тухрĕ. Вăл "2023 çулăн пĕрремĕш çур çулти çивĕч ыйтусем" темăпа пулчĕ. ЦУР пĕлтернĕ тăрăх, 5 уйăхра Патăрьел муниципалитет округĕн администрацине социаллă сетьсем урлă 140 ытла ыйту килнĕ, вĕсенчен ытларах пайĕ çул-йĕрпе (35 процент), çурт-йĕрпе, коммуналлă хуçалăхпа (13), хăтлăхпа (7) çыхăннă.

Калаçу çивĕч ыйтусенчен пĕринчен пуçланчĕ. Социаллă сетьре Патăрьелĕнче Пăла çывăхĕнче шурлăх сарăлса пынине, унăн лайăх мар шăрши кăмăла пăснине пĕлтернĕ. Рудольф Васильевич тасатакан сооруженисене реконструкцилесси паян пурне те хумхантарнине, пуррисем кивелнипе ĕçлеме юрăхсăрланса пынине, çавăн пекех çурт-йĕртен тухакан таса мар шывсем çуллен нумайланнине каларĕ. Анчах çакă ку темăпа ĕçлеме пуçламаннине пĕлтермест. Кăçалхи майăн 31-мĕшĕнче объект докуменчĕсем патшалăх экспертизи витĕр тухнине çирĕплетнĕ. Смета хакĕ 540 млн тенкĕпе танлашать. Муниципалитет ăна хăйĕн вăйĕпе çеç тăваймасть, çавна май Чăваш Республикин инвестици программине кĕрессишĕн тăрăшаççĕ.

Çул-йĕр ыйтăвĕ те эфирта айккинче юлмарĕ. Подписчиксем Анат Туçаран Тутар Тимешне каякан çула хăçан юсама пуçăнасси пирки те кăсăкланчĕç. Патăрьел муниципалитет округĕн пуçлăхĕ Рудольф Селиванов асăннă çула çĕнетес ыйтăва 2024-2026 çулсенчи бюджета çирĕплетнĕ чухне çул-йĕре юсамалли плана кĕртессине пăхса тухассине каларĕ.

Çĕнĕ Ахпỹртри Татьяна хăйсен ялĕнчи Ленин урамĕнчи çула хăçан юсав тума палăртни пирки пĕлесшĕн пулчĕ. Рудольф Васильевич çула пуçару бюджечĕпе çĕнетессине, конкурс ирттернĕ хыççăн проектпа ĕçлеме тытăнассине каларĕ. Çĕнĕ Ахпỹртсене ял пурнăçне хастар хутшăннăшăн, уйрăмах Патăрьел муниципалитет округĕн Пухăвĕн депутатне Евгений Мартышкина тăван тăрăх аталанăвĕшĕн тăрăшса вăй хунăшăн тав турĕ.

 Сосновски пултăранĕ пирки те сăмах пулчĕ. Унăн наркăмăшлă сĕткенĕ ỹте пĕçертсе илсе хăпалантарсах кăларать. Ỹсен-тăран Алманчăра, Турханта, Çĕнĕ Ахпỹртре, Именкассинче, Кзыл Чишмара, Вăтаелĕнче, Треньелĕнче, Пăлаçи Атăкра тата Çăл Атăкра ỹсет. Ăна пĕтерме Александр Краснов предпринимательпе килĕшỹ тунă. Вăл шăпах пултăрана тĕп тăвассипе ĕçлет.

Эфирта çурт-йĕрпе, коммуналлă хуçалăхпа çыхăннă ыйтусем те пулчĕç. Шăнкăртамра нумай ачаллă çемьесене панă микрорайона хальлĕхе газ пымасть. Кăçал "кăвак çулăм" унта илсе çитермелле, пăрăхĕсене 18 çухрăм хывмалла.

Патăрьелĕнчи Киров урамĕнчи нумай хваттерлĕ 28-мĕш çуртра пурăнакансем пỹрт тăрринчен çумăр çунă, юр ирĕлнĕ вăхăтра шыв анни пирки çырса пĕлтернĕ. Рудольф Селиванов кун пирки те тĕплĕн хуравларĕ. Вăл нумай хваттерлĕ çуртсене пĕрлехи пурлăха республика программипе юсанине, кăçал Петр Яковлев урамĕнчи 6-мĕш çурт тăррине çĕнетнине, хальхи вăхăтра Гагарин урамĕнчи 6-мĕш çуртра ĕçсем пынине хыпарларĕ. Çуллахи каникулта ашшĕ-амă- шĕ ачисен сывлăхĕсене çирĕплетессишĕн, вăхăчĕсене усăллă ирттерессишĕн тăрăшать. Хăшĕ-пĕри ятарласа лагерьсене ярать. Çамрăк ăрăвăн халь хамăр тăрăхра та канма условисем пур. Кзыл Чишмара "Сэлэт - маçтăрсен хули" лагерь уçăлнă. Пĕр сменăра 8-18 çулти 100 ача сывлăхне тĕреклетме пултарать. Июнĕн 27-мĕшĕнчен тепĕр смена туризмпа, спортпа, июлĕн 17-мĕшĕнчен кĕвĕ-çемĕпе, юрă-ташăпа, театрпа кăсăкланакансене, августăн 5-мĕшĕнчен пулас кинематографсене хапăл тăвать.

Çур сехете тăсăлнă тỹрĕ эфирта Патăрьел муниципалитет округĕн пуçлăхĕ Рудольф Селиванов тĕрлĕ отрасльпе çыхăннă чылай ыйтăва хуравларĕ. Вăхăт хĕсĕкреххипе хăшĕ-пĕрин патне çитеймерĕ, анчах çакă вĕсем тимлĕхсĕр юласса пĕлтермест. Калаçура янăраманнисене Патăрьел муниципалитет округĕн администрацийĕ Чăваш Республикин регион управленийĕн центрĕпе (ЦУР) пĕрле çывăх вăхăтрах хурав парать.

Патăрьел муниципалитет округĕн пуçлăхĕ Рудольф Селиванов ирттернĕ тỹрĕ эфира https%//vk?com/wall552645666_2345  ссылкăпа курма май пур.

Ольга ПАВЛОВА