Республикăри халăхсен туслăхĕн Çуртĕнче "Чăваш Ен - пирĕн Çурт" этнокультура фестивалĕ иртнĕ. Мероприятие республикăри культура министерстви пуçарăвĕпе йĕркеленĕ. Унта Чăваш Енри Патăрьел, Куславкка, Муркаш, Пăрачкав, Çĕрпỹ, Шупашкар, Етĕрне муниципалитет округĕсенчи, Çĕнĕ Шупашкар, Шупашкар хулисенчи, И.Н.Ульянов ячĕллĕ Чăваш патшалăх университечĕнчи, культурăпа кану центрĕсенчи, наци культурин пĕрлешĕвĕсенчи 300 ытла ăсталăх коллективĕ, уйрăм юрăçсем хутшăннă.

 Фестивальте Шăнкăртамри пĕрремĕш вăтам шкулти кĕçĕннисен "Биляр" ташă ушкăнĕ (ертỹçи Татьяна Торговцева) пысăк хастарлăх кăтартнă, лайăххисенчен пĕри пулнă. Тутар ташши ыттисенчен наци костюмĕпе те, хусканăвĕсемпе те, пĕр пек утăмсем тунипе те илĕртỹллĕ тухнă. Вăл куракансен асĕнче нумайлăха юлĕ.

Фестиваль - тĕрлĕ халăх уявĕ. Пĕр-пĕрин пултарулăхĕ ăсталăха ỹстерме, туслăха çирĕплетме те пулăшать.

Альбина ИВАНОВА