РЕСПУБЛИКĂРА çулленех хĕрарăмсен обществăри вăйне палăртас, ĕçри çитĕнĕвĕсене, кил-çурт тытса пыма пĕлнине, йăла-йĕркене упрама тăрăшнине, обществăлла мероприятисенчи хастарлăхне кăтартас тĕллевпе "Эпĕ - хĕрарăм!" конкурс йĕркелеççĕ. Кăçал унта хутшăнма тĕрлĕ муниципалитет округĕнчен, хуларан 614 заявка панă, вĕсем хушшинче фермерсем, воспитательсем, врачсем, учительсем, нумай ачаллă амăшсем, йĕрке хуралĕнче тăрăшакансем, хăйсен бизнесне йĕркеленисем... пур. Конкурсантсем йĕркеленĕ видероликсене 144 пин ытла çын пăхса хакланă. Сасăлав 10 номинаципе иртнĕ. "Манăн çемье - манăн пуянлăх" ятлинче Патăрьелĕнче пурăнакан Ирина Иванова пĕрремĕш вырăн йышăннă. Сăмах май, Иринăпа Николай пилĕк ачана кун çути парнеленĕ. Вĕсем республикăри "Çулталăк çемйи-2020" конкурсра та мала тухнăччĕ.