Вăтаел ялĕнче çуралса ỹснĕ Петр Нягин Украинăри ятарлă çар операцийĕнчен кĕске вăхăтлăх отпуска килчĕ. Ытларикун вара хăйĕн çемйипе пĕрле Патăрьел муниципалитет округĕн пуçлăхĕпе Рудольф Селивановпа, унăн пĕрремĕш çумĕпе - хăтлăх кĕртессипе территорисен аталанăвĕн управленийĕн начальникĕпе Николай Раськинпа тĕл пулчĕ.

Çулĕпе çамрăк мар çĕршыв хỹтĕлевçи. 35 çул каялла салтак аттине хывнă пулин те тепĕр хут алла хĕç-пăшал тытма хирĕçлемен. Хăй ирĕкĕпе килĕшỹ çырнă. Сăлтавĕ те пур. Шăллĕн ачи Даниель унта пуçне хунă.

 Çĕршыв хỹтĕлевçи çар пурнăçĕпе кĕскен паллаштарчĕ. Юлташĕсен паттăрлăхне палăртрĕ. Сăмах май муниципалитет ертỹçине, округра пурăнакансене салтаксене пулăшнăшăн, хавхалантарса пынăшăн тав турĕ.

Çар операцине хутшăнакансене тыл çыхăнăвĕ кирлех. 3 ача Петр Васильевичăн. Вĕсем ашшĕ патне çырусем çыраççĕ. Килтен пынă хыпарсене темиçе хутчен те вуласа тухать салтак. Хăшне-пĕрне пурăнакан вырăна çыпăçтарса хунине те калать. Çавăнпа çыру çырма та, гуманитари пулăшăвĕ янă çĕре тỹпе хывма та пурин те тăрăшмаллах. Паттăрсем мирлĕ тỹпешĕн, çĕршыв хăрушсăрлăхĕшĕн кĕрешеççĕ-çке.

 - Çарта пурте кирлĕ: алла хĕç-пăшал тытаканни те, апат хатĕрлекенни те, аманнисене сиплекенни те. Командир лайăх пирĕн. Юлташсем те тăван пекех çывăх. Отпускран каялла пырасса куç пек кĕтеççĕ. Пирĕн хыççăн вĕсем килĕсене канма каяççĕ. Неонацистсен мăшкăлĕ пулмастпăрах. Эпир çĕнтеретпĕрех,- терĕ татăклăн çар çынни.

Муниципалитет округĕн пуçлăхĕ Рудольф Селиванов ентешĕмĕрĕн мăшăрĕнчен Марина Анатольевнăран çар служащийĕсен çемйисене тивекен çăмăллăхсем тивĕçнипе тивĕçменнине ыйтса пĕлчĕ. Паттăра Çĕнтерỹпе киле таврăнма ырă сунчĕ

. Петр Васильевич Максим ывăлĕпе Амелия тата Александра хĕрĕсене, мăшăрне çупăрласа Вăтаелне çул тытрĕ. Унăн çемйи халĕ Çĕнĕ Шупашкарта тĕпленнĕ.

Альбина АСТРАХАНЦЕВА