Июнĕн 27-мĕшĕнче Раççейре çамрăксен кунне паллă тунă май Кĕçĕн Патăрьелĕнчи "Олимп" стадионта "Çамрăклăх планети" фестиваль иртнĕ. Яш-кĕрĕме Патăрьел муниципалитет округĕн пуçлăхĕ Рудольф Селиванов, регион аталанăвĕн институчĕн директорĕн тивĕçĕсене пурнăçлакан Алексей Львов, Александр Чернов тьютер, бизнес-тренер, бизнес-коуч саламланă.

- Пирĕн тăрăхра хастар та пултаруллă çамрăксем пурăнаççĕ. Çакна конкурссемпе тĕрĕслевсенчен чылай чухне çĕнтерỹпе таврăнни çирĕплетет. Эпир сире - хитре те хастар, мал ĕмĕтлĕ хĕрсемпе каччăсене - шанатпăр! Сиртен кашнийĕ хăйĕн тĕллевне пурнăçласса, пултарулăхне аталантарасса, ырă ĕçсем тăвас са ĕненсе тăратпăр, - тенĕ Рудольф Васильевич пухăннисене саламланă май.

Чи хастаррисене уявра тĕрлĕ шайри наградăпа чысланă. Çавăн пекех "Чи лайăх çамрăк специалист" конкурса пĕтĕмлетнĕ. "Вĕрентỹри чи лайăх çамрăк ĕçчен" ята Патăрьелĕнчи пĕрремĕш вăтам шкулти Наталья Сагунева аслă вожатăй, "Сывлăх сыхлавĕнчи чи лайăх çамрăк ĕçчен" - Патăрьелĕнчи тĕп больницăри Зиля Калмыкова врач-офтальмолог, "Культурăри чи лайăх çамрăк ĕçчен" - Сителти культура çуртĕнчи культорганизатор Ирина Лякова, "Чи лайăх çамрăк ертỹçĕ" - Треньелĕнчи ача сачĕн заведующийĕ Гулюса Сайдашева, "Муниципалитет службин чи лайăх çамрăк ĕçченĕ" - Патăрьел муниципалитет округĕн администрацийĕн организаципе тĕрĕслев ĕçĕсен пайĕн специалист-эксперчĕ Анна Бильтяева, "Йĕрке хурал органĕн чи лайăх çамрăк сотрудникĕ" - Эльфис Азмуханов, "Патшалăх тивĕçтерĕвĕсен сферинчи чи лайăх çамрăк ĕçчен" - Инна Хлебникова, "Чи лайăх çамрăк предприниматель" - Ильфат Халитов, "Физкультурăпа спорт сферинчи чи лайăх çамрăк ĕçчен" ята "Паттăр" физкультурăпа спорт комплексĕн ачасемпе çамрăксен спорт шкулĕн тренер-преподавателĕ Эльфис Мтиев тивĕçнĕ.

Çамрăксен кунĕнче вĕренỹре палăрнă выпускниксене те саламланă. Сăмах май, кăçал 189 вĕренекен шкултан тухса каяççĕ, вĕсенчен 46-шĕ "Вĕренỹри уйрăм çитĕнỹсемшĕн" медале тивĕçнĕ.

 "Çамрăк лидерсен команди" конкурса, "Çамрăксем руль умĕнче" квест-вăййа, "Кун пекки манăн çеç" автомобиль куравне хутшăнакансемшĕн те çак кун чылайлăха асра юлĕ.

 Ольга ПАВЛОВА