Чăваш Республикинчи шалти ĕçсен органне йĕркеленĕ куна палăртса Патăрьелĕнчи культурăпа кану центрĕнче савăнăçлă мероприяти иртнĕ.

 Çак сферăра вăй хуракансене уявпа шалти ĕçсен министерствин муниципалитетсем хушшинчи "Батыревский" уйрăмĕн начальникĕ Андрей Ларьков полици подполковникĕсаламланă. Вăл кашни полици сотрудникĕ çынсене хăрушсăрлăхпа тивĕçтерессишĕн тата йĕрке пултăр тесе сахал мар тăрăшнине каланă, ветерансене вара вĕсене пулăшса пынăшăн, канашсемшĕн тав тунă. Çавăн пекех Патăрьел муниципалитет округĕн пуçлăхĕн пĕрремĕш çумĕ - хăтлăх кĕртессипе территорисен аталанăвĕн управленийĕн начальникĕ Николай Раськин, Шăмăршă муниципалитет округĕн пуçлăхĕ Александр Чамеев, Патăрьел тата Шăмăршă районĕсен çар комиссарĕ Вячеслав Илюткин сăмах илнĕ.

Служба ĕçне тỹрĕ кăмăлпа пурнăçланăшăн отставкăри Егор Сетриванов, Владимир Александров, Сергей Измуков подполковниксене, çавăн пекех Алексей Степанов лейтенанта, Данил Севрюгин, Максим Лепешкин аслă сержантсене Хисеп грамотипе чысланă. Чылай çул ĕçлесе тивĕçлĕ канăва тухнă Валерий Мальцев прапорщика "Честь. Порядок. Долг" медаль тата Владимир Киргизов подполковника "Ветеран МВД" медаль панă. Ольга Фролова юстици капитанĕ, Алексей Шакаев полици лейтенанчĕ, Наиль Тепитов полици подполковникĕ, Ильнар Фасхутдинов юстици майорĕ, Ильмас Янтыков полици капитанĕ, Владислав Явкин полицин аслă сержанчĕ сумлă наградăсене тивĕçнĕ.

Уяв савăнăçлă концертпа вĕçленнĕ.

Ольга ПАВЛОВА