Июлĕн 1-мĕшĕнче Мускаври "Сокольники" паркра Мускав хулин регионсем хушшинчи çыхăнуна наци политикин департаменчĕ, Чăваш Республикин Правительствипе Чăваш наци культурипе автономийĕ пулăшнипе "Акатуй-2023" уяв иртнĕ. Ăна Раççей тĕп хулинче пурăнакан чăвашсене хăйсен тымарĕ ăçтан тухнине аса илтерес, ыттисене чăваш халăхĕпе тата унăн йăли-йĕркипе паллаштарас, туристсене Чăваш Ене илĕртес тĕллевпе йĕркеленĕ.

Уява хутшăнакансене Чăваш Республикин Пуçлăхĕ Олег Николаев саламланă. "Эпир, ытти халăхсем, вырăс тĕнчипе тата цивилизацийĕпе пĕрлешсе пурăнакансем. Чăваш халăхĕ çак пысăк çемьен пĕр пайĕ, паян вăл хăйĕн йăли-йĕркинче никĕсленĕ вăйне кăтартать", - тенĕ Олег Алексеевич.

 Уявра Патăрьел муниципалитет округĕнчен те пысăк ушкăн хутшăннă. Вĕсем фонтансен лапамĕнче вырнаçнă, уява пухăннисене чăваш кухнипе, ĕç-хĕлĕпе паллаштарнă. Тĕп сценăра Раççей Федерацийĕн тата Чăваш Республикин культурăн тава тивĕçлĕ ĕçченĕ Анатолий Шакин ертсе пыракан Патăрьелĕнчи юрăпа ташă ансамблĕ хăйĕн пултарулăхне кăтартнă. Çавăн пекех хут купăсçăсен ушкăнĕ те тĕрлĕ çемĕпе халăха савăнтарнă.

Акатуйра кашнийĕ чăвашсен йăли-йĕркипе, культурипе паллашнă.

Паллах, спорт ăмăртăвĕсем те иртнĕ. Палăртма кăмăллă, Сител ялĕнчи Владимир Козлов кĕрешекенсем хушшинче иккĕмĕш вырăна тухнă (ỹкерчĕкре).

Ольга ПАВЛОВА