Сăкăтри культура çурчĕ çумĕнчи пуканесен халăх театрĕ хăйĕн ĕçне çуллахи вăхăтра та хавшатмасть. Ялти çитĕнекен ăру çумне каникулта асламăш-кукамăш патĕнче канакан хула ачисем те хутшăнаççĕ. Йыш пур чухне ĕçлеме те кăмăллă. Пĕринче репетицисем тăваççĕ, тепринче пукане, кайăк-кĕшĕк кỹлеписене çĕлеме хăнăхаççĕ ачасем.

Студие çỹрекенсем ку хутĕнче республикăри культура министерстви пуçарăвĕпе Трактор тăвакансен культура керменĕ йĕркеленĕ ачасен ăсталăхĕн "Черчен чечексем" фестиваль-конкурсне хутшăнчĕç. Вăтам ỹсĕм çулĕнчисемпе Левтина Марьен "Вăрман шкулĕ" пьеси тăрăх лартнă спектакльпе иккĕмĕш степеньлĕ лауреат дипломне çĕнсе илчĕç.

Вера Кузнецова ертỹçĕ кăмăлтан ĕçлет çитĕнекен ăрупа. 17 çул çак ĕçе илсе пырать вăл. Ачасен пултарулăхĕпе вара аслисем те кăмăллă. Вылямалли пуканесем, теттесем, декораци çителĕклех вĕсен. Хăшне-пĕрне парнелĕх те хатĕрлеççĕ.

 - Вера Федоровна ĕçĕпе округри централизациленĕ клуб системин специалисчĕсем те кăмăллă. Çĕнĕрен-çĕнĕ спектакльпе тухаççĕ вĕсем халăх умне. Хăйсен пултарулăхне шкулта, ача садĕнче, урамсенче кăтартса савăнтараççĕ. Ушкăнра йывăр шăпаллă çемьесенчи, çурма тăлăх ỹсекен ачасем пурри хăйех мĕне тăрать. Пĕчĕкренех коллектива, ĕçе хăнăхса ỹсеççĕ вĕсем. Хуларан килнисем вара чăвашла калаçма хăнăхаççĕ. Вĕсене ертỹçĕ сыпăкăн-сыпăкăн калаçма, рольсене ăста калăплама вĕрентет,- тет ялти культура çурчĕн директорĕ Вероника Кузнецова.

 Пĕр артист теприне ылмаштарма пултарать тата. Çакă кирек хăш йывăрлăхран та тухма пулăшать. Анастасия Силюкова, Сергей Муллин, Антон Красников, Полина Давыдова, Екатерина Мтина, Богдан Кузнецов, Софья Хитрова, Камилла Петрухина, Максим Пахмулов кашкăр, чĕрĕп, упа, тилĕ çури, вĕсен асламăшĕн, чакак тата Хĕвел ролĕсене ĕненмелле кăларчĕç.

Ачасем аслисене пулăшас ĕçе те хастар явăçаççĕ. Украинăри ятарлă çар операцине хутшăнакансем валли хỹтĕлев сеткине çыхнă чухне пусмана касса тăчĕç.

Календарьпе çыхăннă уявсене мала хураççĕ çамрăк артистсем. Аслă вĕрентекенĕмĕр Иван Яковлев çуралнăранпа 175 çул çитнине халалласа та "Лаша çухатни" спектакль хатĕрленĕччĕ вĕсем. "Кушакпа автан", "Тилĕпе мулкач", "Колосок" спектакльсемпе те темиçе хутчен те халăх умне тухнă.

- Çулсем шултăраланнăран халăх театрĕн ятне тытса тăма, сумне çĕклеме çăмăлах мар. Çавах ачасемпе тата та, тата та ĕçлес килет-ха. Пуканесем çĕлеме, декорацисем ăсталама кирлĕ материалсене Шупашкарти Модăсен çуртнех кайса илетпĕр. Вĕренни хăйсемшĕн пулни паха, - терĕ Вера Кузнецова калаçăва пĕтĕмлетсе.

Альбина АСТРАХАНЦЕВА