Патăрьелĕнчи кивĕ масар çинче часовня пур-ха, унта хĕллехи вăхăтра кĕрсе ăшăнма пулать, çавăн пекех вилнисене пытарма илсе килсен сыв пуллашмалли пỹлĕм те туса хăварнă. Çĕнĕ çăваран унта çитме çывăхах мар, çавăнпа Патăрьелсем канашланă хыççăн тепре тума шут тытнă.

 Июнĕн 29-мĕшĕнче часовня пулмалли вырăна палăртса сăвапларĕç. Ку ĕçе Патăрьел муниципалитет округĕн пуçлăхĕн пĕрремĕш çумĕ - хăтлăх кĕртессипе территорисен аталанăвĕн управленийĕн начальникĕ Николай Раськин, Патăрьел территори уйрăмĕн начальникĕ Николай Ялуков, Улатăр тата Пăрачкав епархийĕн III округĕн благочиннăйĕ, çветтуй Троица ячĕллĕ Туçа чиркĕвĕн настоятелĕ "Батыревский" пĕрлешỹ ĕçченĕсем, Николай Марков протоиерей, Сергей Шадиряковпа Николай Николаев ял старостисем тата ыттисем хутшăнчĕç.

- Масар çинче часовньăсене, çуртсене çĕнетсе пыни, территорине хăтлăрах туни лайăх пулăм. Халăх çак ĕçсене хăй пуçарулăх кăтартса пурнăçланине ырламалла, - терĕ Николай Раськин. Пулас часовня вырăнне палăртнă хыççăн Николай Марков протоиерей кĕлĕ вуласа сăвапларĕ, пĕрлех усăллă сĕнỹсем пачĕ.

Ольга ПАВЛОВА.

Шухăш

Николай НИКОЛАЕВ, Патăрьел ял старости:

- Тăванăмăрсем ĕмĕрлĕх канлĕх тупнă вырăна тирпейлесе тăрасси пирĕн кашнийĕн тивĕçĕ. Хăтлăх кĕртнипе пĕрлех çын вилсен пытарнă чухне тивĕçлĕ условисем те кирлĕ. Çакна шута илсе ĕнтĕ çĕнĕ часовня тума шут тытрăмăр. Унта çурта лартма та, кĕлĕ ирттерме те, ĕç хатĕрĕсене упрама та май пулать. Объекта пĕр е икĕ çын вăйĕпе çеç хута яраймастăн, çавăнпа та кашнийĕ май пур таран - укçа-тенкĕпе, ĕçлесе - пулăшасса шанса тăратпăр. Халăх вĕрсен хапха та уçăлать, теççĕ. Кун пирки манас марччĕ.