Патăрьел муниципалитет округĕнчи арçынсем хушшинче (8х8) футболла выляс енĕпе уçă чемпионат иртнĕ. Вăййа хутшăнакансене тата куракансене Патăрьел муниципалитет округĕн пуçлăхĕн пĕрремĕш çумĕ - хăтлăх кĕртессипе территорисен аталанăвĕн управленийĕн начальникĕ Николай Раськин, муниципалитет округĕн футбол федерацийĕн председателĕ Александр Филиппов тата ытти хăнасем саламланă.

Чемпионата Патăрьел тата Комсомольски округĕсенчи 9 команди хутшăннă. Вăл апрелĕн 1-мĕшĕнчен пуçласа июлĕн 2-мĕшĕччен пынă. Пурĕ 64 матч вылянă. 158 гол тапса кĕртнĕ.

 Чемпионат пĕтĕмлетĕвĕпе "БТВ" команда виççĕмĕш вырăна тухнă. Иккĕмĕшĕнче - "Керамик". Çĕнтерỹçĕ вара - "Бикшикташ" (сăн ỹкерчĕкре). Палăртма кăмăллă, пьедесталăн вырăнĕсене пĕтĕмпех Юхмапа Пăла тăрăхĕн футболисчĕсем йышăннă.

Вăййа хутшăнакансене тĕрлĕ номинаципе чысланă: Фенис Карама - "Чи лайăх вратарь", Александр Белинов - "Чи лайăх çамрăк вылякан", Руслан Измагилов - "Чи лайăх хỹтĕлевçĕ", Александр Анисимов - "Чи лайăх ассистент", Николай Романов - "Чи лайăх бомбардир", Марсель Яфизов - "Чи лайăх вылякан".

 Финалти вăййа пăхма кăмăллă пулнă. Вăл куракансене хавас кăмăл парнеленĕ. Командăри кашни вылякан хăйĕн ăсталăхне кăтартнă.

Альбина ИВАНОВА