Патшалăхăн пĕрлĕхлĕ экзаменĕсем ăнăçлă вĕçленчĕç. Вăтам шкултан вĕренсе тухакансем алла аттестат илчĕç. Кăçал тата кăтартуллă пулчĕç вĕсем. Шкулпа сыв пуллашакан 63 ачаран тăваттăшĕ 100-шер балл пухма пултарчĕ. Иккĕшĕ - вырăс чĕлхипе, пĕри - историпе, тепри - общствознанипе. Çакăншăн питĕ хĕпĕртерĕмĕр. Иртнĕ вĕренỹ çулĕнче пĕр ача 100 балл илнĕччĕ. Виçĕм çул та пĕр çамрăкăн кăна чи пысăк балл пулнăччĕ.

Вăтам балпа пăхсан, кăтартусем иртнĕ çулхинчен лайăхрах. Коронавирус вăхăтĕнче ачасене ППЭне хатĕрленме кăткăс пулчĕ. Мĕнле хатĕрленмеллине, еплерех ыйтусем пулассине ун чухне пурте чухласа çитереймен. Кăçал ачасем ăнланса, тĕллевлĕн хатĕрленчĕç. 11 классем ППЭне тивĕçлĕ шайра тытрĕç. Пирĕн кăçал шкулпа паралельлĕ виçĕ класс сыв пуллашать. Пĕри - психологипе педагогика класĕ. И.Н.Ульянов ячĕллĕ Чăваш патшалăх университетне, И.Я.Яковлев ячĕллĕ Чăваш патшалăх педуниверситетне вĕренме каяççĕ. Тепри - инженерипе техника класĕ. Виççĕмĕшĕ - социаллă экономика класĕ.

Учительсем хăйсен ĕçне яланах пысăк явап-лăхпа пурнăçласа пыраççĕ. Хăйсенчен мĕн килнине ачасене йăлт параççĕ. Вĕренекенсем онлайн шкулсене хастар хутшăнаççĕ. Профиль шкулĕсенче вĕренеççĕ. Мускаври, Питĕрти, Хусанти шкулсемпе, аслă шкулсенчи преподавательсемпе пĕрле экзаменсене хатĕрленеççĕ. Эпир Чăваш патшалăх университечĕпе тата педуниверситетпа, Чĕмпĕрти техника университечĕпе тачă çыхăнса ĕçлеме килĕшỹсем турăмăр. Çавна май пирĕн ачасем дистанци шкулĕсенче пĕлỹ илеççĕ. Репетиторсемпе экзаменсене хатĕрленесси унччен анлăрах сарăлнă. Халĕ ачасем ăнланса пыраççĕ, учитель урокра мĕн пултарнине йăлт парать. Çавăнпа урăх педагог, урăх вузри преподавательсем ăнлантарнине итлесшĕн. Пĕлỹ илмелли урăх майсем тупма çăлкуçсем шыраççĕ. Пирĕн выпускниксенчен 95-99 проценчĕ çулсеренех вĕренме аслă шкулсене кĕрет. Кăçал та çаплах пуласса шанатăп. Халĕ пирĕн шкулта - 1091 ача. Вăл Юхмапа Пăла тăрăхĕнче кăна мар, республикăри кăнтăр округĕсенче те чи пысăкки шутланать. Пире кăçал унчченхи выпускниксем те савăнтарчĕç. Пилĕк çул каялла шкултан вĕренсе тухнă икĕ çамрăк Мускаври вузсенче "ылтăн" выпускниксен шутне кĕнĕ. Пĕри - Н.Э.Бауман, тепри И.М.Сеченов ячĕллĕ аслă шкулсенче пĕлỹ пухрĕç.

Наталия АНДРЕЕВА, Патăрьелĕнчи пĕрремĕш вăтам шкул директорĕ