Июлĕн 5-мĕшĕнче Патăрьел муниципалитет округĕнче Мордва Республикинчи Ардатов район пуçлăхĕ Александр Антипов ертсе пынипе сумлă делегаци ĕçлĕ çул çỹревпе пулчĕ.

Юхмапа Пăла тăрăхне хапăл тунă хăнасене Патăрьел муниципалитет округĕн пуçлăхĕ Рудольф Селиванов, Шăхачри "Умарина" халăх ансамблĕн юрăçисем çăкăр-тăварпа кĕтсе илчĕç.

Тĕл пулу вăхăтĕнче Чăваш Республикинчи Патăрьел округĕпе Мордва Республикинчи Ардатов районĕн пуçлăхĕсем икĕ муниципалитет пĕр-пĕринпе килĕштерсе ĕçлесси çинчен килĕшỹ çырчĕç.

- Ял аталанăвĕ çĕнĕлĕхсене пурнăçа кĕртмесĕр пулмасть. Пирĕн паянхи икĕ енлĕ килĕшỹ халăхăн социаллă пурнăçне, ял хуçалăхне, культурăпа вĕрентĕве, физкультурăпа спорта, харпăр хăй ĕçне тата ыттине туллин аталантарма, пĕр-пĕрин ырă опытне усă курма, Патăрьел муниципалитет округĕпе Ардатов районне çĕнĕ ỹсĕмсем тума çеç пулăшĕ,-терĕ Патăрьел муниципалитет округĕн пуçлăхĕ Рудольф Селиванов документа алă пуснă май.

Ун хыççăн Мордва Республикинчен килнĕ делегаци Патăрьелĕнчи ачасен пултарулăх шкулĕн пурнăçĕпе, Решид Санзяпов тата Леонид Кузнецов фермерсен ĕçĕ-хĕлĕпе, туса илекен продукцийĕсемпе паллашрĕ.

Альбина ЕГОРОВА