РФ ШĔМĕн муниципалитетсем хушшинчи "Батыревский" уйрăмĕнчи ГИБДД пайĕнчен пĕлтернĕ тăрăх çулсеренех çуллахи каникул вăхăтĕнче çул çитмен ачасем теветкеленсе руль умне ларни, тепĕр чухне авари сиксе тухни те пулать. Акă, иртнĕ вырсарникун çеç каçхине Патăрьелĕнчи аслă урамри "Водолей" магазин умĕнче çул-йĕр правилине пăхăнмасăр çăмăл автомашинăпа мотоцикл авари тунă.

 Мотоцикл рулĕ умĕнче шăпах çул çитмен арçын ача пулнă. Юрать-ха телейĕ пулнă, шăпи синкерлĕ çаврăнса тухман. Суранланнăскере çийĕнчех сиплев учрежденине илсе кайнă. Авари тума хутшăннă водитель вара нимĕн пулман пекех куçран çухалнă.

 Водитель удостоверенине алла илме çул çитмен ача автомашинăпа е мотоциклпа килтен тухса кайнăшăн саккунпа килĕшỹллĕн ашшĕ-амăшĕ явап тытать. Сăмах май каласан, Патăрьел муниципалитет округĕ çумĕнчи çул çитмен ачасен прависене хỹтĕлекен комисси ларăвĕнче те çакнашкал тĕслĕхсене час-часах пăхса тухаççĕ, ачисене тивĕçлĕ воспитани парса çитереймен ашшĕ- амăшне штраф параççĕ.