Пĕтĕм Раççейри Çемье, юрату тата шанчăклăх уявĕн пĕлтерĕшĕ, сумĕ çулран çул ỹссех пырать. Çакна июлĕн 7-мĕшĕнче Патăрьел муниципалитет округĕнчи Мăшăрлану керменĕнче йĕркеленĕ мероприяти тепĕр хут çирĕплетсе пачĕ. Хальхинче сумлă уява Чăваш Республикин Пуçлăхĕн указĕпе килĕшỹллĕн 2023 çулхи январĕн 1-мĕшĕнчен кун çути курнă пепкесемпе вĕсен ашшĕ-амăшне ятарлă парнепе, çавăн пекех нумай çул пĕрле килĕштерсе пурăнакан хисеплĕ мăшăрсене "Юратупа шанчăклăхшăн" медальпе чыс турĕç.

Сумлă мероприятие Патăрьел муниципалитет округĕн пуçлăхĕ Рудольф Селиванов, Чăваш Республикинчи юстици ĕçĕсен патшалăх службин ертỹçин çумĕ Алексей Вязов, Пăлапуç Пашьел, Аслă Чемен, Ыхра Çырми территори пайĕсен пуçлăхĕсем Владимир Никитин, Станислав Капитонов, Фениль Алиуллов, уява чĕннĕ хисеплĕ хăнасен çывăх тăванĕсем хутшăнчĕç.

Çемье, юрату тата шанчăклăх уявĕ кăçал "çĕнĕ кайăк" туяннă çамрăк мăшăрсене саламланинчен, Республика Пуçлăхĕн ятарлă парнипе чысланинчен пуçланчĕ. Çак чыса Патăрьелĕнчи Алла Михайловăпа (виççĕмĕш пепке) Надежда Думилина (йĕкĕреш хĕр ачасем) тата Анат Тăрмăшĕнчи Татьяна Ширтанова (тăваттăмĕш пепке) тивĕçрĕç.

Малалла Мăшăрлану керменĕн хисеплĕ вырăнне Юхмапа Пăла тăрăхĕнчи ĕç паттăрĕсем, сумлă та хисеплĕ ветерансем, нумай çул пĕрле пурăнса ял-йышра, таврара ят-сум çĕнсе илнĕ мăшăрсем йышăнчĕç. Мендельсон маршĕпе утса кĕнĕ виçĕ мăшăр умĕнче те пуç тайма паян сăлтавĕ пысăк. Патăрьел муниципалитет округĕн ЗАГС пайĕн ертỹçи Наталия Емелина уява ертсе пынă май "Юратупа шанчăклăхшăн" медале тивĕçнĕ ĕç ветеранĕсемпе пуринпе те тĕплĕн паллаштарчĕ.

Акă, Пăлапуç Пашьелĕнчи Иван Георгиевичпа Мария Ильинична Афанасьевсем çемье чăмăртани 57 çул çитнĕ. Пилĕк ача ашшĕпе амăшĕ пирки нумай ыррине, лайăххине калама пулать. Иккĕшĕ те çамрăклах ĕçе кỹлĕннĕ. Çемье пуçлăхĕ шкултан вĕренсе тухса тракторист-машинист профессине алла илнĕ хыççăнах Казахстан облаçне ĕçлеме кайнă, автомобильсемпе ял хуçалăх машинисене "чун кĕртнĕ". 1964 çулта яла таврăнсан колхозра, Пăла лесничествинче тăрăшнă. Ĕçри çитĕнỹсемшĕн Хисеп грамотисемпе Тав çырăвĕсене тивĕçнĕ. Мăшăрĕ те мĕн тивĕçлĕ канăва тухичченех тỹрĕ чунпа ĕçленĕ. Малтан - хуçалăхра, кайран шкул коллективĕнче - техслужащире.

Ыхра Çырминчи Рафаэль Шейдулловичпа Тазкире Асадулловна Ахметовсем - интеллигенци çемйи. Рафаэль абый ялти вăтам шкулта ачасене 40 çул ĕç урокĕнче пурнăç илемне туйма, çĕнĕ япаласем ăсталама вĕрентнĕ. Вăл общество пурнăçĕнче яланах хастар, ĕçре кăтартуллă пулнă. Çакна паян унăн çемье архивĕнче упранакан тĕрлĕ шайри сумлă наградăсем те çирĕплетсе параççĕ. Мăшăрĕ, Тазкире Асадулловна та мĕн çамрăкранпах унпа юнашар ĕçленĕ. Тутар чĕлхине вĕрентнĕ аслă категориллĕ учительница Чăваш, Тутар Республикисенчи вĕрентỹ министерствисен Хисеп грамотине пĕр хутчен мар илнĕ. "Çулталăк учителĕ" пулнă, пархатарлă ĕçшĕн ЧР Президенчĕн премине те тивĕçнĕ тата ытти те. Питĕ килĕшỹллĕ, çемье йăли-йĕркине упракан хисеплĕ мăшăр тăватă ача çуратса тивĕçлĕ воспитани панă.

Аслă Чементе пурăнакан Герман Михайловичпа Лидия Алексеевна Фроловсем те хăйсен ачисемпе мăнукĕсемшĕн çеç мар, ыттисемшĕн те ырă тĕслĕхлĕ. 48 çул упраççĕ вĕсем иккĕшĕн хушшинчи таса туйăма. Çак хушăра икĕ хĕрпе пĕр ывăл çитĕнтернĕ. Вĕсем те иккĕшĕ те педагог-ветеран, тивĕçлĕ канăва тухичченех Аслă Чементи вăтам шкулта тăрăшнă. Лидия Алексеевна - "Халăха вĕрентес ĕç отличникĕ" ята тивĕçнĕ. Вĕсен Алексей ывăлĕ - чăн-чăнах çĕршыв патриочĕ. Вăл контрактпа службăра, Украинăри ятарлă çар операцийĕн участникĕ, ВДВн 31-мĕш гварди дивизийĕн сержанчĕ. Хĕрĕсем пĕри инженер, тепри проектировщик пулса ĕçлеççĕ, ашшĕ-амăшĕнчен ырă тĕслĕх илеççĕ.

 ЗАГС пайĕнче Пĕтĕм Раççейри Çемье, юрату тата шанчăклăх уявĕ тулли кăмăлпа, пысăк хавхаланупа иртрĕ.

- Юратупа çеç эпир вăйлă, тĕреклĕ, пуян пулма пултаратпăр. Çак таса туйăма кашни çемье упратăр. Петрпа Февроний çветтуйсен ырă тĕслĕхĕ çемьесене пурăнма хавхалантартăр, вĕсене пулăшса пыччăр, - терĕ Патăрьел муниципалитет округĕн пуçлăхĕ Рудольф Селиванов пурне те уяв ячĕпе саламланă май.

Альбина ЕГОРОВА