Патăрьел муниципалитет округĕн пуçлăхĕ Рудольф Селиванов тата унăн çумĕ - строительство, çул-йĕр тата çурт-йĕрпе коммуналлă хуçалăх пайĕн начальникĕ Равиль Ямалетдинов Первомайски тата Пăлапуç Пашьел территори пайĕсенче пыракан строительство ĕçĕсемпе паллашнă.

"Хăрушлăхсăр паха çулсем" наци проекчĕн витĕмĕпе "Калинино -Патăрьел - Елчĕк" автоçулăн Первомайскипе Анат Чакă ялĕсем хушшинчи сыпăкĕнче "Регион-Свет" тулли мар яваплă пĕрлешĕвĕн ĕçченĕсем тротуар сараççĕ. Унăн тăршшĕ 1313 метр пулĕ. Çавăн пекех вĕсем çуран çỹрекенсене хăрушсăрлăхпа тивĕçтерес тĕллевпе тротуарпа автоçул хушшинче карлăк, карта тытĕç, светофор вырнаçтарĕç, çул-йĕр паллисене лартĕç, çул паллине (разметка) сăрлĕç тата ытти те. Объектри ĕçсене июлĕн 15-мĕшĕ тĕлне вĕçлемелле.

 Пăлапуç Пашьелĕнче "Культура" наци проекчĕпе килĕшỹллĕн ялти культура çуртне юсама пикеннĕ. Кунти ĕçсене "Стройэнергосервис" ĕçченĕсем пурнăçлаççĕ. Проектпа пăхнă юсав хакĕ 7 миллион тенкĕпе танлашать. Хальхи вăхăтра строительсем зданин тулашне капăрлатас енĕпе тăрăшаççĕ.

 Объектсенчи лару-тăрупа паллашнă май Рудольф Селиванов ĕçе вăхăтра вĕçлемеллипе пĕрлех пахалăх пирки те самантлăха та манмалла марри çинчен аса илтернĕ.

Александр ИВАНОВ