Чăваш Республикин регион управленийĕн центрĕ (ЦУР) хула тата муниципалитет округĕсен администрацийĕсен пуçлăхĕсен аккаунчĕсен пĕрремĕш çур çулхи рейтингне хатĕрленĕ. Экспертсем чиновниксене 10 критерипе хакланă. Пысăк балл пуçтарас тесен вĕсен хăйсен страницисене "Контактра", "Одноклассники" тата Телеграмра кирлĕ пек йĕркелесе пымалла пулнă. Палăртма кăмăллă, малтанхи пилĕк лидер йышне Патăрьел муниципалитет округĕн пуçлăхĕ Рудольф Селиванов та кĕнĕ. "Чăваш Енри муниципалитет округĕсен пуçлăхĕсен пурин те социаллă сетьсенче - "Контактра", "Одноклассники" тата Телеграмра - страницисем пур. Хăшĕсен лайăхрах пулать, теприсен начартарах. Çапах та чиновниксем самана таппинчен юлманни савăнтарать"- тесе пĕлтерет Чăваш Республикин регион управленийĕн центрĕн (ЦУР) ертỹçи Татьяна Немцева.

Александр ИВАНОВ