Первомайски территори пайĕнчи Каншел тата Пăлаçи Атăк ялĕсенче пурăнакансем çулленех Питравра пысăк уяв йĕркелеççĕ. Унăн сумĕ кăçал тата та ỹсрĕ. Питрав вăййине республикăри анатри чăвашсен фольклор ушкăнĕсем те хутшăнчĕç. Мероприяти пуçланиччен вĕсем карталанса вăййа тухрĕç. Уява территори пайĕн начальникĕ Анатолий Сорокин уçрĕ.

Ял халăхне, килнĕ хăнасене уяв ячĕпе Патăрьел муниципалитет округĕн пуçлăхĕ Рудольф Селиванов саламларĕ. Рудольф Васильевич Каншелсемпе Атăксем пĕрле ĕçлеме, пĕрле савăнма пĕлнине палăртрĕ.

Чăваш Республикин Патшалăх Канашĕн депутачĕ, çакăнта çуралса ỹснĕ Валерий Антонов юнашар икĕ ялта пурăнакансем туслă пулни, вĕсен хастарлăхĕ, савăк кăмăлĕ куçĕсенче палăрнине пĕлтерчĕ ентешĕсене ырă суннă май.

Çавăн пекех Патăрьел муниципалитет округĕн депутачĕсен Пухăвĕн депутачĕсем Владимир Федоровпа Александр Иванов, "Куснар" çĕр ĕç фирмин Первомайски уйрăмĕн ертỹçи Александр Ахмеев, райпо правленийĕн председателĕ Сергей Счетчиков, "Шуçăм" ача сачĕн заведующийĕ Надежда Емельянова та саламларĕç.

Чи хастаррисемпе пултаруллисем тĕрлĕ шайри Хисеп хучĕсемпе, парнесене тивĕçрĕç.

Чăваш Республикинче 2023 çул - Телейлĕ ачалăх çулталăкĕ пулнăран уява Первомайски ача сачĕн Каншел филиалне çỹрекен çитĕнекен ăру "Маленькая страна" юрăпа уçрĕ. Унтан сценăна фольклор ушкăнĕсем йышăнчĕç. Вĕсем Патăрьел, Комсомольски, Шăмăршă, Елчĕк, Канаш тата ытти муниципалитет округĕсенчен пулчĕç. Пĕр ушкăн хыççăн тепри савăк юрăсене шăрантарчĕ. Хаваслă кĕвĕ-юрă аякка-аякка саланчĕ.

Пухăннисем волейболла, мини футболла вылякансене, ирĕклĕ майпа кĕрешекенсене хавхалантарса тăчĕç. Çĕнтерỹçĕсем парнеллĕ пулчĕç.

Питрав кунĕнчех Кĕçĕн Чеменпе Упамсара пурăнакансем та Ял уявĕсене йĕркелерĕç. Вĕсен савăнăçне пĕрле пайлама Патăрьел муниципалитет округĕн пуçлăхĕ Рудольф Селиванов тата Чăваш Республикин Патшалăх Канашĕн депутачĕ Валерий Антонов та кăмăл турĕç (сăн ỹкерчĕксенче, 2 стр.)

Альбина АСТРАХАНЦЕВА