Çĕньял территори пайĕнчен Украинăри ятарлă çар операцине хутшăнакансем сахал мар. Чылайăшĕ алла хĕç-пăшала "Эпир мар пулсан, кам!" чĕнỹпе тытнă. Чăннипех те патриотсем вĕсем. Çĕршыва хỹтĕлемеллех-çке. Мобилизаци йĕркипе кайнă Рудольф Макаров, Артур Елимов, Сергей Паймулкин, Илья Бобров, Анвар Миронов, Денис Савельев, Николай Захаров кĕске вăхăтлăх отпусксенче те канчĕç. Çак вăхăтра ялти пĕтĕмĕшле пĕлỹ паракан тĕп шкулта вĕренекенсемпе те тĕл пулчĕç.

Контракт мелĕпе Украинăри ятарлă çар операцине Артурпа Александр Осиповсем кайнăччĕ. Халĕ килте вĕсем. Алексей Шакин, Юрийпе Денис Елимовсем, Алексей Карзаков, Валерий Пузыров, Валерийпе Руслан Мадюковсен маттурлăхне палăртмалла.

- Неонацистсем патне курайманлăх кашнийĕн çуралать. Мĕншĕн мирлĕ пурнăçра пуç çийĕн пуля вĕçмелле? Территори пайĕнче пурăнакансем кар тăрсах пулăшаççĕ ентешсене. Çар операцине хутшăнакансене кашнинех 20-шер пин тенкĕ укçа пухса пачĕç. УАЗ автомашина ăсатрăмăр. Çĕнĕскер мар, паллах. Маларах усă курнăскер. Çавах хавас пулчĕç ентешсем. Техникăна юсаса çĕнетме ял çамрăкĕсем хаваспах пулăшрĕç. Шупашкарта пурăнакан Сергей Савельев, ялта тĕпленнĕ Петр Захаров сахал мар тăрăшрĕç. Александр Антонов, Николай Мурзуков, Дмитрий Квасов та айккине тăрса юлмарĕç. Патăрьел волонтерĕсемпе пĕрле вара çула Сергей Семеновпа Сергей Савельев тухрĕç,- каласа парать территори пайĕн начальникĕ Мария Мадюкова.

 Автомашинăна пушăлла та яман. Гуманитари пулăшăвĕ тиенĕ: апат-çимĕç, тумтир, эмелсем, гигиена хатĕрĕсем хунă.

Маскировна сетки те çыхма ỹркенмеççĕ. Çак ĕçе Надежда Квасова культура ĕçченĕ йĕркелесе пырать. Çиччĕшне унта ăсатнă та ĕнтĕ. Ун валли ятарлă хатĕр тунă. Пусмисене Шупашкартан илсе килнĕ. Малтанхисем йывăртарах пулса тухнă. Халĕ çумăр çусан та, пылчăкпа варалансан та нỹр тытман пусма тăрăхĕ туяннă. Ял халăхĕ утă хатĕрлессине вĕçлесен тепĕр хут çак ĕçе пикенме тĕллев лартать. 30-40 çын харăсах пухăнма çăмăлах та мар. Еленăпа Мария Антоновасем, Мария Терентьева, Валентина Нестерова тата ытти пенсионерсем пĕринчен те юлмаççĕ. Укçа-тенкĕ пухассине Алексей Михайлов, Валентина Нестерова лайăх йĕркелесе пыраççĕ. Кам 100 тенкĕ, кам пин тенкĕ сĕнет. Борис Емельянов çемйи 20 пин тенкĕ панă. Унпа пĕр тăван Мускавра пурăнакан аппăшĕ-йăмăкĕ тата 15 пин тенкĕ хушнă. Патăрьелĕнче ĕçлекен Александр Трифонов уйрăм предприниматель темиçе хутчен те мунча кăмаки туса панă. Тимĕр сеткăсем ăсатать.

Укçан та пулăшу сĕнет. Алса тулĕсемпе тивĕçтерет. Çар операцине хутшăнакансем хăйсем те ял халăхĕпе пĕрлĕхре пуласшăн.

Автомашина юсанă чухне Денис Васильев, Алексей Шакин, Юрий Елимов счет çине вуншар пин тенкĕ укçа куçарса панă

 Территори пайĕнче пурăнакансем Шупашкарти Украинăри ятарлă çар операцине хутшăнакансене пулăшакан ZOV Победы фондпа çыхăнса ĕçлеççĕ. Мобилизаци йĕркипе кайнисен çемйисене те тимлĕхре тытаççĕ. Анвар Миронов ачине Турханти ача садне вырнаçтарнă тата ытти те.

Территори пайĕнче пурăнакансен тăрăшулăхне маларах та сахал мар илтнĕ. Конституци тивĕçне пурнăçлама каякан кашни çамрăка вĕсем культура çуртĕнче ял халăхĕпе пил парса, ал шăлли çактарса ăсатса яраççĕ. Контракт мелĕпе çĕршыв хуралне тăракансене те сумлаççĕ. Ку хутĕнче отпуска килнĕ Юрий Елимова (вăл службăна урăх çĕртен кайнă пулсан та) çĕнтерỹпе таврăнма ырă çул сунчĕç.

Çаксем пурте чунра хавхалану кỹреççĕ-ха. Анчах вăрçă хирĕнче ĕмĕрлĕх пуçне хунисем куççуль кăлараççĕ. Алексей Елимов старшинапа Николай Киркин аслă лейтенанта асăнса лартнă палăк умĕнчен никам та хурланусăр иртместех.

 Пĕрлĕхре - вăй пулнине кашнийĕ ăнланать. Çавăнпа кам ялта, кам ятарлă çар операцийĕнче çĕнтерĕве куллен çывхартма тăрăшать. Конктракт мелĕпе каяссине те хирĕçлемест.

 Альбина АСТРАХАНЦЕВА