РАÇÇЕЙ вĕрентỹ министрĕ Сергей Кравцов Педагогпа наставник çулталăкĕнче старт панă "Тавах вĕрентекенĕме" ("Спасибо учителю") акци социаллă сетьре кунсерен сарăлса пырать. Выпускниксем, тĕрлĕ çулта шкултан вĕренсе тухнисем хăйсене тĕрĕс çул çине кăларнă учителĕсене ăшă сăмахпа тав тăваççĕ, вĕсен пархатарлă ĕçне пысăк хак параççĕ. Акă, "Авангард" хаçатăн тусĕ, Ыхра Çырминчи вăтам шкулта чăваш чĕлхипе литературине вĕрентекен Светлана Кулакова та вулакансене юратнă ĕçĕн вăрттăнлăхне уçса пачĕ. Унăн наставникĕ -Треньелĕнче пурăнакан Валентина Даниловна Алексеева вĕрентекен. Тăван чĕлхе пуянлăхне, çепĕçлĕхне, вăл чăнах та пуринчен ытла çывăх пулнине, ăна пулах вăл хăйне малашлăхра юратнă учитель вырăнĕнче курнине шкулта вĕреннĕ чухнех туйса илнĕ. Акци малалла та пынă май Валентина Даниловнăна вăл çакăншăн чун-чĕререн тав тăвать: "Тавах вĕрентекенĕме тăван чĕлхене хак пама вĕрентнĕшĕн", - тет вăл кăмăллăн.