Чăваш Республикин тава тивĕçлĕ учителĕ, педагог, пысăк квалификациллĕ категориллĕ хушма пĕлỹ паракан педагог Мария Петровна Урукова июлĕн 18-мĕшĕнче 75 çулхи юбилейне паллă тăвать. Вăл 1948 çулта Туçара çуралнă.

Мария Урукова Иван Яковлев ячĕллĕ Чăваш патшалăх педагогика институтĕнчен (халĕ университет) вĕренсе тухнă. Ĕç стажне Кивĕ Ахпỹртри 8 класс вĕренмелли шкултан пуçланă. 1987 çултанпа Шупашкарта пурăнать. 1987-1990 çулсенче Шупашкарти 42-мĕш, 1990 çултан 59-мĕш шкулсенче математика вĕрентнĕ. 2000-2007 çулсенче пĕрлех Илья Ульянов ячĕллĕ Чăваш патшалăх университетĕнче те студентсене ăс панă. Шупашкарти ачасемпе çамрăксен пултарулăх çуртĕнче ачасен "Интеграл" коллективне ертсе пынă. Чăваш Республикин вĕрентỹ институтĕнче учительсен квалификацине ỹстермелли курсра лекцисем вуланă.

Ентеш наукăпа педагогика публикацийĕсен, вăл шутра "Сборник творческих работ", "Чувашский край в математических задачах" электронлă сборниксен авторĕ. Унăн статйисем "Математика в школе", "Народная школа" журналсенче, "Математика" хаçатра пичетленнĕ. Вăл "Ахах çутин сапакĕсем", "Тăван кил çутипе, тăван кил ăшшипе" кĕнекесем кăларнă.

Мария Петровна "Золотой учитель СОРОСа" (1999) ята тивĕçнĕ. Раççей Федерацийĕн чи лайăх учителĕсен конкурсĕнче çĕнтернĕ. Раççей Федерацийĕн Президенчĕн премине илнĕ, республикăри "Çулталăк шкулĕ-1999" конкурс лауреачĕ. Çавăн пекех ăна Чăваш Республикин вĕрентỹ тата çамрăксен политикин министерствин Хисеп грамотипе наградăланă.

 ("Çулталăк кĕнекинчен").