Июлĕн 19-мĕшĕнче Патăрьел муниципалитет округĕнче Пĕрлехи информаци кунĕ иртрĕ. Власть представителĕсемпе халăх хушшинчи çыхăнăва çывăхлатас тĕллевпе йĕркелекен йăлана кĕнĕ мероприятие Чăваш Республикин Министрсен Кабинечĕн Председателĕн çумĕ - сывлăх сыхлавĕн министрĕ Владимир Степанов, Патăрьел муниципаитет округĕн пуçлăхĕ Рудольф Селиванов, ЧР Патшалăх Канашĕн депутачĕ Николай Степанов, Патăрьел муниципалитет округĕнчи депутатсен Пухăвĕн председателĕ Николай Тинюков тата ыттисем те хутшăнчĕç.

 Республика представителĕсем чăн малтанах Патăрьел муниципалитет округĕн администрацийĕн Пысăк залĕнче кун йĕркине лартнă ыйтусене - хула тата муниципалитет округĕсенче нумай хваттерлĕ çуртсен картишĕсен территорийĕсене хăтлăх кĕртесси, муниципалитетсем хушшинче автобус маршручĕсем йĕркелесси, нумай ачаллă çемьесене, сусăрсене социаллă пулăшупа тивĕçтересси - сỹтсе яврĕç. Малалла информаци ушкăнĕ Патăрьел муниципалитет округĕн пуçлăхĕпе Рудольф Селивановпа палăртнă вырăнсене çитсе пĕрле татса памалли ыйтусене çивĕчлетрĕ, юлашкинчен граждансене хăйсен ыйтăвĕпе йышăнчĕ.

 Информаци кунне хутшăннисене пленарлă ларура чăн малтанах кун йĕркине лартнă пĕрремĕш ыйтупа Патăрьел муниципалитет округĕн пуçлăхĕн çумĕ-строительство, çул-йĕр тата пурăнмалли çурт-йĕрпе коммуналлă хуçалăх ыйтăвĕпе тимлекен çумĕ Равиль Ямалетдинов Юхмапа Пăла тăрăхĕнче ялсене хăтлăх кĕртессипе пурнăçласа пыракан программăсемпе, пурнăçлакан ĕçсемпе, малашнехи ĕмĕт-тĕллевпе паллаштарчĕ.

Сăмах май каласан, 2020-2022 çулсенче Патăрьел, Шăнкăртам, Первомайски, Туçа, Кĕçĕн Арапуç, Пăлапуç Пашьел ялĕсене хăтлăх кĕртес тĕлĕшпе 22 проекта (59,1 миллион тенкĕлĕх) пурнăçа кĕртнĕ. 2023 çулта Патăрьел муниципалитет округĕнче нумай хваттерлĕ 3 çурт территорине хăтлăх кĕртме палăртнă. Владимир Степанов вице-премьер çак ĕçсене вăхăтра тата пахалăхлă пурнăçламалли, подрядчиксен ĕçне, ача-пăча лапамĕпе çыхăннă объектсене сăнаса, тĕрĕслесе тăмалла пирки çирĕп асăрхаттарчĕ, кашни пурнăçланă ĕç яваплăхпа çыхăннине палăртрĕ.

Информаци кунĕн программипе килĕшỹллĕн муниципалитетсем хушшинчи автобус маршручĕсем пирки те хĕрỹ калаçу пычĕ. Хальхи вăхăтра Патăрьел тăрăхĕнче тĕрлĕ маршрутпа 3 индивидуаллă предприниматель çула тухать. Унсăр пуçне кашни яла 11 автобус куллен çỹрет. Вĕсемпе пуринпе те 5 çуллăха контракт çырнă. Кун йĕркине лартнă ыйтăва çивĕчлетсе Патăрьел муниципалитет округĕн пуçлăхĕ Рудольф Селиванов рейса тухакан автобуссен тăкакĕ пысăк пулни чăн малтанах хăйсен пайтишĕн, налук тỹлемесĕр çула тухакан таксистсем йышланнипе çыхăннине пĕлтерчĕ, ку тĕлĕшпе малашне ГИБДД сотрудникĕсен те, налук службисен те ĕçе çивĕчлетмеллине каларĕ. Пĕрлехи информаци кунне кĕртнĕ тепĕр пĕлтерĕшлĕ ыйту халăха социаллă пулăшу парассипе çыхăннă. Пленарлă ларура унпа муниципалитет округĕнчи социаллă ыйтусемпе ĕçлекен пай пуçлăхĕ Наталия Никитина паллаштарчĕ, ку тĕлĕшпе Юхпапа Пăла тăрăхĕнче пурнăçласа пыракан ĕçсем пирки каласа пачĕ, нумай ачаллă çемьесем усă куракан çăмăллăхсемпе паллаштарчĕ.

Юлашкинчен информушкăн Патăрьелĕнчи Советская урамри 172, 173, 174-мĕш çуртсен таврашĕнче хальхи вăхăтра хула хăтлăхне кĕртмелли программăпа килĕшỹллĕн пыракан ĕçсемпе паллашрĕ.