ПАТĂРЬЕЛ муниципалитет округĕнчи хисеплĕ спорт ветеранĕ Алексей Краснов юлашки çулсенче "Победитель" урхамахĕпе тĕрлĕ шайри ăмăртăва хутшăнса сахал мар çитĕнỹ тăвать. Çак кунсенче çеç вăл Ульяновскинчи юртă лашасен пысăк ăмăртăвне хутшăннă, ушкăн призне çĕнсе илессишĕн чупнă 1600 метрлă дистанцире 2 минут та пĕр çеккунт ытларах вăхăтпа финиша пĕрремĕш кĕнĕ. Чăваш Республикин чысне ăмăртура улттăн хỹтĕленĕ. Çавăн пекех старта Самара, Ульяновск, Мускав облаçĕсенчен, Мордва Республикинчен чи хăвăрт чупакан 32 юртă лаша тăнă. Юхмапа Пăла тăрăхĕн мăнаçлăхĕ шутланакан "Победительпе" унăн хуçи дистанцие çăмăллăн парăнтарнă, ăмăртуран кăмăллă таврăннă.