ĔÇ çынна илем çеç кỹмест, ырă ят, хисеп çĕнсе илме те пулăшать. Патăрьелĕнчи ветеринари службинче тăрăшакан Алина Быкова тухтăр пирки те çак сăмахсенех каласшăн. Çамрăк специалист Чăваш ял хуçалăх академийĕнчен вĕренсе тухнă хыççăнах "чĕлхесĕр янаварсемпе" ĕçлеме пикеннĕ. Ача чухнех выльăхсене юратнă хĕрача алла диплом илнĕ хыççăнтанпах кăмăлланă профессипе тăрăшать. Тỹрĕ чунлă та ăста çамрăк специалист икĕ хутчен Чăваш Республикин Пуçлăхĕн стипендине те тивĕçнĕ. Общество пурнăçĕнче те хастар.

Хальхи вăхăтра Алина Юрьевна Патăрьелĕнчи ветеринари службин ĕçченĕ. Вăл кушаксемпе йытăсене сиплет, стерилизацилет. Унсăр пуçне пысăк выльăхсен сывлăхне çăлса хăварас тĕллевпе те чун-чĕререн тăрăшать. Акă, нумай пулмасть çеç вăл Кĕçĕн Патăрьелĕнчи пĕр хушма хуçалăхра пăрулама пуçланă ĕнене, пăруне çăлса хăварнă. Выльăх йывăрлăха кĕрсе ỹкнипе хуçасем ветспециалиста чĕнсе илнĕ. Вăл вара вырăна çитсен нумай шутласа тăман, пĕчĕк пăрăва пепке пекех хырăмĕнчен касса кăларнă, ĕнин суранне çĕлесе хунă.