Юхмапа Пăла тăрăхне йывăç-тĕм лартса симĕслетес, хамăр пурăнакан тавралăха капăрлатас, хăтлăлатнă объектсен пахалăхне лайăхлатас тĕллевпе Патăрьел муниципалитет округĕ "Чи хăтлă ял" ("Самый благоустроенный населенный пункт"), "Кăтартуллă урам" ("Образцовая улица"), "Кăтартуллă хушма хуçалăх" ("Лучшее личное хозяйство"), "Организацисен чи хăтлă территорийĕ" ("Самая благоустроенная территория организации"), "Пурте усă куракан чи хăтлă объект" ("Самый благоустроенный объект общего пользования") номинацисемпе йĕркеленĕ конкурса пĕтĕмлетнĕ.

Унăн пĕтĕмлетĕвĕпе Туçари Çамрăксен урамĕ "Кăтартуллă урам", Нăрваш Шăхалĕнчи вăтам шкул территорийĕ "Организацисен чи хăтлă территорийĕ", çветтуй Владимир князь ячĕллĕ Алманчăри купель "Пурте усă куракан чи хăтлă объект" ятсене тивĕçнĕ. Комисси вĕсенчи тирпей-илеме, хăтлăха пысăк хак панă.

"Кăтартуллă хушма хуçалăх" номинацире Патăрьелĕнчи Крепков урамĕнчи Владимир Селендеев хуçалăхĕ пĕрремĕш, Нăрваш Шăхалĕнчи Апăрша урамĕнчи Юрий Григорьев хуçалăхĕ иккĕмĕш, Тури Чакăри Тĕп урамри Борис Парусов хуçалăхĕ виççĕмĕш вырăнсене тухнă.

 Конкурса хутшăннă ялсем "Чи хăтлă ял" номинаци критерине тивĕçтермен пирки çак ятпа чыслама йышăнман.

(Хамăр корр.)