Патăрьел муниципалитет округĕнче ял хуçалăх предприятийĕсем иртнĕ кĕçнерникун вырмана тухрĕç. Çĕр ĕçченĕсен 16821 гектар çинчен пĕрчĕллĕ тата пăрçа йышши культурăсене пухса кĕртмелле. Каçалăка "Красное Знамя" коллективлă ял хуçалăх предприятийĕн тата "Батыревский" акционерсен хупă пĕрлешĕвĕн ĕçченĕсем уçрĕç.

Муниципалитет округĕн администрацийĕн пуçлăхĕн çумĕ - экономика, ял хуçалăх, çĕр тата пурлăх хутшăнăвĕсен пайĕн начальникĕ Виктор Львов çỹлерех асăннă хуçалăхсенче пулса вырма ĕçĕсемпе интересленнĕ, вĕсене ăнăçу суннă.

Тыр-пул çитĕнтерекенсем вырмана кĕске вăхăтра тата пысăк пахалăхпа ирттерме шантарнă.

Çавăн пекех Ферид Чабатовпа Камиль Салихов хресчен фермер хуçалăхĕсенче те комбайнсем уй-хире тухнă.

 Тухăç хальлĕхе кашни гектартан вăтамран 29,4 центнер кĕрсе пырать. Урпан пысăкрах та.

Альбина ИВАНОВА