Хăйĕн пурнăçри кун-çулне техникăпа ĕçлесе ирттернĕскер уй-хире тухса çилпе чỹхенсе ларакан тырă пуссисене курсан чунĕ савăнать Анат Туçари Владимир Перепелкинăн. Паян тивĕçлĕ канура вăл. Çемьепе 40 сотăй çĕр çинче çĕр улми, кишĕр, ытти пахча çимĕç çитĕнтереççĕ. Яра куна ĕçлесси çук ана çинче. Хĕвел çỹл тỹпене хăпарсан канма кĕрет.

Мăшăрĕ те килтех. Валентина Алексеевна та ялта çуралса ỹснĕскер. 10 класс вĕреннĕ хыççăн вăл хулана каяс шухăш тытман. Колхоз правленийĕ ăна направленипе Шупашкара бухгалтерсене вĕрентекен курса кайма сĕннĕ. Ун хыççăн хĕр "Гвардеец" колхоза ĕçе вырнаçнă. Малтанласа аслисем ăна кассир пулма шаннă. Кайран бухгалтера лартнă. Пĕрлех кадрсен пайĕн специалисчĕн тивĕçĕсене те пурнăçланă.

Паян 5 хутчен кукамайпа кукаçи пулнă Перепелкинсем çак çула çитнине сисмерĕç те. Ачисемпе кĕрỹшĕсем, мăнукĕсем вĕсене мăшăрланнăранпа 50 çул çитнĕ ятпа ăшшăн саламларĕç.

 Иртеççĕ çулсем, шăваççĕ кунсем. Çĕнĕрен пурнăç çулĕпе утмалла пулсан та çак сукмаксенех суйласа илнĕ пулĕччĕç Владимир Гавриловичпа Валентина Алексеевна. Пурнăçра мĕн кирли пурте пур вĕсен. Çемье çирĕп, çурт-йĕр капмар, ăрăва малалла тăсакан ачасемпе мăнукĕсем савăнтараççĕ. Тата мĕн кирлĕ. Ирина хĕрĕ Елчĕк районĕнчи Энтепе ялĕнче пурăнать. Унăн ывăлĕ çар службинчен таврăнса республикăн тĕп хулине ĕçе вырнаçнă. Хĕрĕ ялти шкула çỹрет.

Маринăпа Оля Шупашкара тĕпленнĕ. Вăталăххин хĕрпе ывăл, кĕçĕннин хĕр ỹсет. Тăван киле хĕрĕ- ывăлĕ, мăнукĕсем пуçтарăнсассăн çурт тулать. Ватăсен те савăнăçĕ виçесĕр. Вĕсем ашшĕ-амăш пилне çĕре ỹкерменни хĕпĕртеттерет.

 Иккĕшĕ те ĕç ветеранĕ ята тивĕçнĕ. Хисеп хучĕсем те сахал мар.

- Ĕç çынна хисепе кăларать. Ỹркенмелле çеç мар. Аслисем хушнине итлемелле, вĕрентсе каланине ăша хывмалла, çавă çеç. Патăрьел - Елчĕк çула туни те асра. Ун чухне автогрейдерпа ĕçленĕччĕ. Каярах ака-сухана хутшăннă. Тивĕçлĕ канăва тухиччен тимрĕç лаççинче вăй хутăм. Сывă пурнăç йĕркине кăмăллатпăр. Çавăнпа никам умĕнче те пит хĕрелесси çук пирĕн,- тет Владимир Гаврилович. Çакăн çумне тата мĕнех хушайăн.

Альбина ИВАНОВА