ХАЛЬХИ вăхăтра Патăрьелĕнчи тĕп больницăн тĕллевлĕ направленийĕпе 52 студент тĕрлĕ специальноçпа аслă пĕлỹ илет. Вĕсенчен чылайăшĕ тăван ене килсе ĕçлеме ĕмĕтленет. Çакă шăпах малашне "Сывлăх сыхлавĕ" наци проекчĕпе килĕшỹллĕн кадр ыйтăвне татса пама пулăшĕ.

Акă, хальхи вăхăтра Патăрьелĕнчи тĕп сиплев учрежденийĕнче И.Н. Ульянов ячĕллĕ Чăваш патшалăх университечĕн медицина факультетĕнчи пĕрремĕш-виççĕмĕш курс студенчĕсем çуллахи практикăна ирттереççĕ. Муниципалитет округĕнчи тĕп больницăн тĕп тухтăрĕ Николай Тинюков хаçат редакцине пĕлтернĕ тăрăх, пулас специалистсене опытлă тухтăрсем çумне çирĕплетнĕ, вĕсем пурте хăйсен ĕçне чун-чĕререн парăнса пурнăçлаççĕ, медицинăн çĕнĕ сиплев мелĕсене алла илме тăрăшаççĕ.