Июлĕн 25-мĕшĕнче Патăрьел муниципалитет округĕн пуçлăхĕн çумĕ - строительство, çул-йĕр тата пурăнмалли çурт-йĕрпе коммуналлă хуçалăх пайĕн начальникĕ Равиль Ямалетдинов ертсе пынипе чрезвычайлă лару-тăрăва асăрхаттарас тата сирес, пушар хăрушсăрлăхĕпе тивĕçтерес тĕлĕшпе тимлекен комиссин черетсĕр ларăвĕ иртнĕ.

 Унта 2023 çулхи июль уйăхĕнче Патăрьел муниципалитет округĕнче шăрăх çанталăк тăнине пула тăпрари нỹрĕк кирлĕ шайра пулманни пирки калаçу пынă. Патăрьел муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕлĕн пайĕн начальникĕ Виктор Львов каланă тăрăх, июнĕн 28-мĕшĕнче, июлĕн 8-мĕшĕнче тата июлĕн 18-мĕшĕнче Патăрьелĕнчи метеостанци тăпрари нỹрĕк шайне тĕрĕсленĕ. Вăл вара 10 мм çеç пулнă.

Сăмах май каласан, "Авангард" хаçатăн иртнĕ номерĕнче (№52, июлĕн 25-мĕшĕ) "Çут çанталăк сиен кỹнĕ ыйтăва пăхса тухнă" материалта кун пирки тĕплĕн çырнăччĕ. Çавăн пекех Юхмапа Пăла тăрăхĕнче чрезвычайлă лару-тăрăва "хатĕр тăмалли" режим йышăнни пирки те пĕлтернĕччĕ. Халĕ вара комисси Патăрьел муниципалитет округĕнче чрезвычайлă лару-тăру йĕркине йышăннă, муниципалитет округĕн администрацийĕ ăна çирĕплетсе постановлени кăларнă.

Александр ИВАНОВ