Уява Пÿртлĕсем тĕплĕн хатĕрленнĕ. Ир-ирех клуб çумĕнчи лапамра хуранпа шÿрпе вĕресе ларать, çепĕç кĕвĕ, спорт вӑййисем те хӑйсем патне илĕртрĕç. Артистсем концерт лартма хатĕрленсе тӑчĕç. Илемлĕ чӑваш кĕвĕ çемми ял-йыша уява йыхравларĕ. Самаях пуçтарӑнчĕç кунти   лапама ял çыннисем тата аякран килнĕ

Пÿртлĕ ялĕн кунĕ ячĕпе  пухăннисене  Патăрьел муниципалитет округĕн пуçлăхĕ Рудольф Селиванов, Первомайски территори пайĕн ертÿçи Анатолий Сорокин, Патăрьел муниципалитет округĕн  депутатсен Пухăвĕн депутачĕ Александр Иванов саламларĕç.  

Паллах, уява илемлетекенсем юрă ăстисем пулчĕç.  Халăха илĕртÿллĕ те çепĕç сассисемпе Пÿртлĕ ялĕн хĕрарăмĕсен ушкăнĕ, Владимирпа Любовь Верликовсем,  Анат Чакăран килнĕ «Телей» ушкăн, Каçал Енри «Шăхаль» фольклор тата «Шанчăк» эстрада ушкăнĕсем тата ыттисем те савăнтарчĕç. Вĕсем шăрантарнă юрăсене итлесе куракансем чунтан киленчĕç, тăвăллăн алă çупса хавхалантарчĕç. Ял-йыш  Пÿртлĕри хĕрсен ташă ушкăнне те кăмăлларĕ.

Уявра спорт вăййисем те питĕ кăсăклă иртрĕç. Ачасем велосипедпа ярăнассипе ăмăртрĕç. Аслисем вара вĕрен туртса, калуш ывăтса,  çуран чупассипе вăй виçрĕç. Чечен вӑрҫинче пуҫне хунӑ Алексей Еремеева асăнса футболла вылярӗҫ. Унта виҫӗ команда хутшӑнчӗ.   Мала тухнисене сумлă парнесемпе хавхалантарчĕç.

Пÿртлĕ ялĕн кунĕнче пĕр çын та кĕреке хушшине лармасӑр юлмарĕ.  Пысăк хуранпа пĕçернĕ тутлӑ шÿрпе, ял-йыш илсе тухнӑ тутлӑ кукӑль-пÿремеч, сиплĕ чей пурин валли те çитрĕ.  Чылайчен янӑрарĕ илемлĕ кĕвĕ-юрӑ. Ял халӑхĕ те чун каничченех ташларĕ, савӑнчĕ çак уявра.

Ирина Лякова