Патăрьелĕнчи тĕп библиотекăра Çĕнĕ Шупашкарти технологипе управлени академийĕн ректорĕ Иван Селивановпа унăн çумĕ Олег Рыбаков пулнă.

Иван Михайлович хăйĕн "Сотрудничество на года: караван науки древней империи инков" кĕнекин темиçе экземплярне вулавăша парнеленĕ. Аса илỹсен кĕнекинче "Мемуары длиною в жизнь" (виççĕмĕш пайĕ) коммерциллĕ мар профессиллĕ вĕрентỹ организацийĕн технологипе управлени академийĕ Перу Республикин инди йăхĕн авалхи империйĕн университечĕсемпе (2013-2023 çулсенче) туслă çыхăнура пулнине çырса кăтартнă. Авторăн библиотекăна парнеленĕ тăваттăмĕш кĕнеки пулнă çакă.

 Иван Михайлович Кĕçĕн Арапуç ялĕнче çуралнă, биологи наукисен докторĕ, профессор. Хусанти ветеринари институтĕнче, аспирантурăра вĕреннĕ. Ĕç биографине Вологодски интитутĕнче пуçланă, унтан Волгоградри патшалăх ял хуçалăх институтне куçнă. Чăваш Республикин тĕп патшалăх ветеринари инспекторĕ те пулнă. Мускав патшалăх университечĕн Çĕнĕ Шупашкарти филиалĕн директорĕнче, регионти технологипе управлени институчĕн ректорĕнче ĕçленĕ. 2014 çултанпа вара Çĕнĕ Шупашкарти технологипе управлени академийĕн ректорĕнче вăй хурать. 300 ытла наука ĕçĕ пичетленĕ. Вăл шутра 3 монографи авторĕ.

Иван Михайловичăн кĕнекипе библиотекăра паллашма пултаратăр.

Альбина ИВАНОВА