Шăнкăртам ялĕнче республикăри мечĕтсен çумĕнче йĕркеленĕ шкулсенче вĕренекенсен уявĕ иртнĕ. Ăна Раççейри Педагогпа наставник, Чăваш Республикинчи Телейлĕ ачалăх çулталăкне халалланă.

Уява прихутсене çỹрекен 6-14 çулсенчи ачасем тĕн наставникĕсемпе тата воспитателĕсемпе хутшăннă.

Официаллă пая муниципалитет округĕн пуçлăхĕн çумĕ - строительство, çул-йĕр тата çурт-йĕрпе коммуналлă хуçалăх пайĕн начальникĕ Равиль Ямалетдинов, Чăваш Республикин вĕрентỹ тата çамрăксен политики министрĕн çумĕ Марина Лежнина, Шăнкăртам территори пайĕн начальникĕ Марат Айзатуллов, Чăваш Енри мăсăльман тĕн управленийĕн председателĕ Мансур хазрат Хайбуллов хутшăннă.

Номинацисемпе пысăк бал пуçтарнă командăсемпе наставниксене чысланă. Çавăн пекех тĕн управленийĕ Запорожье облаçĕнчи Бердянски районĕнчи Осипенкори вăтам шкулта вĕренекенсем валли пухнă канцеляри таварĕсене вĕрентỹ министерствине панă.

Уяв вăхăтĕнче кĕлĕ тăвассине тата Коран вулассине йĕркеленĕ.

Альбина ИВАНОВА