ШĂНКĂРТАМРИ пĕрремĕш вăтам шкулти Татьяна Торговцева тренер ертсе пыракан "Биляр" ташă ушкăнне паян 50 ытла ача çỹрет. Ташăçăсем коллективра çеç мар, Шăнкăртам территори пайĕнче, Патăрьел муниципалитет округĕнче йĕркелекен кашни мероприятинче тенĕ пекех хăйсен пултарулăхĕпе куракана тыткăна илеççĕ. Сцена ăстисем республикăра та чи паллă творчество ушкăнĕсенчен пĕри. Вĕсен программинче чăваш, тутар, ытти халăх ташшисем, эстрада, çĕнĕ стиллĕ ташăсем те пур. Пултаруллă ертỹçĕ çулсерен пилĕк-ултă хореографи произведенине сцена çине кăларать. Ĕçне кура вара хисепĕ, сумĕ те савăнтарать. Нумай пулмасть Татьяна Валерьевнăна ашшĕ-амăшĕ ачисене илемлĕх тĕнчипе тачă çыхăнтарнăшăн чун-чĕререн тав тунăччĕ. Çак кунсенче çеç вара Чăваш Енри мăсăльмансен тĕн управленийĕн председателĕ, ЧР Общество палатин членĕ Мансур хэзрэт Хайбуллов ташă ушкăнне ятарласа "Меслима" комплекса йыхравласа культурăри пысăк çитĕнỹсемшĕн саламланă, кашни çамрăк сцена ăстинех парнепе савăнтарнă, унăн ертỹçине Тав хучĕпе чысланă.