Çак сăмахсене сывлăш-десант çарĕсен кунĕнче Патăрьелĕнчи палăк умне пуçтарăннă уявра сăмах илнĕ кашни ветеран каларĕ.

 Десантниксене професси уявĕ ячĕпе Патăрьел муниципалитет округĕн пуçлăхĕ Рудольф Селиванов, Патăрьел тата Шăмăршă районĕсен çар комиссарĕ Александр Илюткин, Юхмапа Пăла тăрăхĕнчи сывлăш-десант çарĕсен ветеранĕсен пĕрлĕхĕн ертỹçи Виталий Яковлев, уява пуçтарăннă ытти ветерансем саламларĕç, малашне те пурнăçра ыттисемшĕн ырă кăтарту пулмаллине палăртрĕç.

- Патăрьел муниципалитет округĕнчи тĕрлĕ çар службинче пулнă салтаксем, çамрăксене патриотла воспитани парас, вĕсемшĕн ырă тĕслĕх пулас, Тăван çĕршыва юратас тĕллевпе пысăк ĕç туса пыраççĕ. Ку тĕлĕшпе десантник-ветерансем те яланах кăтартуллă,-терĕ Рудольф Васильевич уява пухăннисене Сывлăш-десант çарĕсен кунĕпе саламланă май.

Çавăн пекех августăн 2- мĕшĕнче Первомайскинче десантниксене асăнса стела уçнă.

Альбина ЕГОРОВА

Алексей Митрофанов, Кивĕ Ахпỹрт ялĕ, сывлăш-десант çарĕсен ветеранĕ:

- Ветерансем çулсеренех пĕрле пуçтарăнни, пĕр-пĕрне саламлани, аса илни ырă та пархатарлă пулăм. Ватă ĕнтĕ эпĕ, саккăрмĕш теçетке урлă та каçнă. Апла пулин те çак мероприятинчен пĕрре те юлма тăрăшмастăп. Службăра 1962-1965 çулсенче пултăм. Ун чухне пирĕн салтак тумĕ пачах урăхлаччĕ. Халĕ десантниксен тумĕ те хитре, хисепĕ те пысăк.