Раççей Тинĕс çар флочĕн кунĕнче Çĕньялти "Хавал" кану паркĕнче территори пайĕнчи мĕн пур ăрури моряксене асра тытса палăк уçнă. Çакна пуçаракансем Макаровсен çемйи пулнă.

Палăк уçнă çĕре муниципалитет округĕн пуçлăхĕн социаллă ыйтусемпе ĕçлекен çумĕ, администрацин финанс пайĕн начальникĕ Светлана Чернова, Çĕньял территори пайĕн начальникĕ Мария Мадюкова, флот ветеранĕ - регионти "Морское братство - союз моряков" обществăлла организаци канашĕн вырăнти уйрăмĕн председателĕ Анатолий Казенов тата ыттисем хутшăннă.

Светлана Чернова ветерансене уяв ячĕпе саламланă май палăк çынсен, уйрăмах çамрăксен Тăван çĕршыва юратас туртăмне ỹстерме пулăшасса шанса тăнине палăртнă.

Улатăрпа Пăрачкав епархийĕн III округĕн благочиннăйĕ, çветтуй Троица ячĕллĕ Туçа чиркĕвĕн настоятелĕ Николай Марков протоиерей палăка сăвапланă, çавăн пекех пухăннисене паллă кунпа саламланă.

Мероприятие хутшăнакансем пурнăçран уйрăлнă моряксене асăнса пĕр самант шăп тăнă.

Альбина ИВАНОВА