Патăрьел муниципалитет округĕнчи Кзыл Чишма ялĕнчи "Сэлэт-Батыр" центрĕнче ачасен канăвĕн виççĕмĕш смени вĕçленчĕ.

 Çав ятпа йĕркеленĕ мероприятие Патăрьел муниципалитет округĕн пуçлăхĕ Рудольф Селиванов, Чăваш Республикинчи вĕрентỹ тата çамрăксен политикин министрĕ Дмитрий Захаров, унăн çумĕ Марина Лежнина, Чăваш Енри Ача прависене хỹтĕлекен уполномоченнăй Алевтина Федорова, муниципалитет округĕн пуçлăхĕн социаллă ыйтăвĕсемпе ĕçлекен çумĕ - финанс пайĕн начальникĕ Светлана Чернова, муниципалитет округĕн администрацийĕн вĕрентỹ, çамрăксен политики, физкультура тата спорт управленийĕн начальникĕ Ирина Рубцова хутшăнчĕç.

Рудольф Васильевич хăйĕн сăмахĕнче ачасен лагерьте ирттернĕ кашни кунĕ чăннипех те кăсăклă мероприятисемпе, яланлăха юлакан çĕнĕрен çĕнĕ пулăмсемпе асра юласса палăртрĕ. Кану çитĕнекен ăрăва пĕлỹ шайне пуянлатма, хăйсене çирĕп тытма хăнăхма пулăшрех. "Сире эпир тата та кĕтетпĕр",- терĕ малашлăхра ăнăçу сунса.

Чăваш Енри тата Тутарстанри 100 вĕренекен 13 кун хăйсен ăсталăхне музыка, ташă тата театр енĕпе туптарĕ. Кашни кун вĕсем теори тата практика пĕлĕвне илчĕç.

 Вĕрентỹ программи 3 тĕп блокпа пычĕ: музыка, хореографи тата театр. Ачасем юрлама хăнăхрĕç. Хăйсем сăвă çырса кĕвĕлерĕç. Актер ăсталăхне туптарĕç. Çавăн пекех ку чухнехи тата халăх ташшисене вĕренчĕç. Занятисене професси ăстисем, паллă спикерсем ирттерчĕç. Çавна май ачасем ăсталăхне çỹлĕ шая хăпартма пултарчĕç. Вĕрентỹ программипе пĕрлех лагерьте тĕрлĕ илĕртỹллĕ мероприятисем те пулчĕç. Ачасем спорт вăййисене хутшăнчĕç, çĕнĕ юлташсем тупрĕç. Канăва йĕркелекенсем коллективпа пĕр йышра пулма хăнăхтарчĕç, кашни ачан ăсталăхне уйрăммăн палăртма майсем туса пачĕç.

 Смена вĕçĕнче вара гала-концерт пулчĕ. Унта канакансем хăйсен творчествăри çитĕнĕвĕсене кăтартрĕç. Кашни çакăнпа мăнаçланма пултарчĕ.

 Виççĕмĕш смена ачасен чĕрине асран кайми кăмăл-туйăм хăварчĕ. "Сэлэт-Батыр" вĕсемшĕн чăннипех тăван кил вырăнĕнче пулчĕ.

 Альбина ИВАНОВА