Çамрăксен форумĕ иртнĕ

Атăл леш енче августăн 5-8-мĕшĕсенче çамрăксен 1-мĕш "МолГород-2023" форумĕ ĕçленĕ. Унта Чăваш Республикин тĕрлĕ кĕтесĕнчен тата федерацин Атăлçи округĕнчен 500 ытла хастар та пултаруллă çамрăк хутшăннă. Мерприятин тĕллевĕ - çамрăксен компетенци шайне ỹстересси тата Шупашкар хулипе Чăваш Ен аталанăвĕн процесĕсенче яш-кĕрĕме професси, пултарулăх енчен аталанма майсем туса парасси. Форумра Чăваш Республикин Пуçлăхĕ Олег Николаев, РФ Патшалăх Думин депутачĕ Алла Салаева, правительствăри яваплă çынсем çамрăксемпе курса калаçнă.

Çĕнĕ комбайн

Республикăра пурăнакансем хăмла татакан комбайн ятне суйлĕç. "Халăх тĕрĕслевĕ" тата Патшалăх пулăшăвĕсен порталĕсенче сасăлав пырать. Вăл икĕ тапхăрпа иртет. Ăна августăн 18-мĕшĕнче пĕтĕмлетĕç. Аса илтеретпĕр, хăмла пуçтаракан агрегата "Техма-Агромаш" заводра пуçтараççĕ. Комбайна август вĕçĕнче тĕрĕслĕç. Хăйне пур енчен те лайăх кăтартсан производствăна ярĕç. Çапла майпа заводра çулталăкне 5-10 машина кăларма палăртаççĕ.

Фестиваль йыхравлать

Август уйăхĕн 12-19-мĕшĕсенче Шупашкарти юхан шыв портĕнче "Раççейĕн симĕс ылтăнĕ" фестиваль иртĕ. Хутшăнакансене ĕçлĕ тĕл пулусем тата культура программи кĕтет.

Патшалăх пулăшать

 "Пĕчĕк тата вăтам предпринимательлĕх" наци проекчĕ пулăшнипе усламçăсем хăйсен бизнес-проекчĕсене 500 пин тенкĕ таран илме пултараççĕ. "Грантшăн 49 çын тупăшĕ", - пĕлтерет ЧР Экономика аталанăвĕн министерстви. Укçана тивĕçес текенсен хăйсен проекчĕсене комисси умĕнче хỹтĕлемелле. Çак уйăх вĕçĕнче çĕнтерỹçĕсене палăртĕç.

Çĕлен сăхсан...

Августăн пĕрремĕш эрнинче Чăваш Енре 9 çын çĕлен сăхнипе медицина пулăшăвĕ ыйтма пынă. Тухтăрсем çĕлен сăхсан тỹрех васкавлă пулăшу машинине чĕнме калаççĕ. Вăл киличчен инкек тỹснĕ алла е урана хускатмалла мар, антигистамин препарачĕпе усă курмалла.

Шăрăх халех вĕçленмĕ

Ку эрнере республикăра 30 градусран ăшăрах пулчĕ. Кăнтăр енчи округсенче 34 градуса та çитрĕ. Синоптиксем пĕлтернĕ тăрăх, тепĕр эрнере те Чăваш Енре ăшă та типĕ çанталăк хуçаланĕ.

"Валдай" расписанийĕ улшăнĕ

 Шупашкар-Хусан тата Хусан-Шупашкар маршрутсемпе çỹрекен "Валдай" теплоход 15 сехетре çула тухĕ. Çĕнĕлĕх августăн 15-мĕшĕнчен вăя кĕрĕ. Шупашкарти юхан шыв портĕнче ăнлантарнă тăрăх, çакă кун кĕскелнипе çыхăннă.

Комбайн çуннă

Шăмăршă округĕнче комбайн çунса кайнă. "Строитель плюс" предприятин Дон-1500Б комбайнĕурпа вырнă. Сасартăк унăн мотор отсекĕ çунма тытăннă. Чăваш Енри Гостехнадзор пĕлтернĕ тăрăх, комбайн юсавлах пулнă. Техтĕрĕслев витĕр июлĕн 12-мĕшĕнче тухнă.