Патăрьел муниципалитет округĕн пуçлăхĕ Рудольф Селиванов ял хуçалăх предприятийĕсенчи вырма ĕçĕпе кăсăкланнипе пĕрлех умри çивĕч ыйтусене татса парассине те тимлĕхре тытать. Çак кунсенче вăл "Молочные зори" производство кооперативĕнче ĕçлĕ çул çỹревпе пулнă.

Тĕл пулури тĕп калаçусенчен пĕри - сĕт хакĕ. Патăрьел муниципалитет пуçлăхĕпе "Молочные зори" СПССПК ертỹçи унăн хакне тытса тăрас, сĕт туса илекенсен тата продукцие тирпейлекенсен ыйтăвне шута илес пирки калаçăва çивĕчлетнĕ.

Çавăн пекех завод кăларакан каяш шыв пирки те хĕрỹ калаçу пулнă. Социаллă сетьре те ку ыйтăва пĕрре мар хускатаççĕ. Кооператив ертỹçи ăна татса пама хатĕрленни, завод тасатакан сооружени проектне хатĕрлени пирки те пĕлтернĕ. Хальхи вăхăтри тасатакан сооружени производство калăпăшне кура тулли хăватпа ĕçлесе ĕлкĕреймест. Малашне çак ыйту татăлмалла. Çĕнĕ проект хакĕ 25 миллион тенке ларать. Ăна кăçалхи ноябрьте хута яма палăртаççĕ.

 Патăрьел муниципалитет округĕн пуçлăхĕ Рудольф Селиванов çак ыйту яланах тимлĕхре, пирĕн тăрăхри экологи лару-тăрăвĕ пуриншĕн те пĕлтерĕшлĕ пулнине каланă.

Альбина НИКОЛАЕВА