3. Эх, вăхăт талпăнăвĕн тĕрлĕ тĕссемлĕ тата асамлă сехечĕ... Пĕр чарăнмасăр, ним чухлĕ те ывăнмасăр, хĕвеле май çаврăнаççĕ те çаврăнаççĕ унăн ылтăн йĕпписем. Вĕсем шăнк! та шăнк! туса малалла куçса пынă май, кунпа çĕр ылмашăнать, тĕксĕм чаршавлă çĕр хĕвеллĕ куна ал парать. Çапла майпа ĕçпе кану эрнисемпе уйăхĕсем тата пĕтĕмлетỹ çулталăкĕсем хыçа юлаççĕ, пĕчĕк ачасем ỹссе çитĕнсе, ашшĕ-амăшĕ пулăшнипе, пурнăç çулĕ çине тухаççĕ.

Çын пурнăçĕнче юбилей кунĕсем те - ăраскаллă-и эсĕ е санăн малтанласа йĕркеллех пынă тивлетлĕ кун-çул сукмакĕ хальхи вăхăтра тумхахлă та сулнăклă çулсем витĕр тăсăлать - санăн кил алăкĕ умне пĕрин хыççăн тепри килсех тăраççĕ.

Вадим Долинин Ульяновск облаçĕн пысăк районĕнчи культура керменĕнче ĕç биографийĕн страницине уçнăранпа сисĕнмесĕрех çирĕм пилĕк çул иртсе кайрĕ. Паян акă ресторанта çывăх тăванĕсемпе тата ĕçтешĕсемпе пĕрле аллă çулхи юбилейне те чаплăн палăртса ирттерчĕ. Пилĕк çул каялла кăна-ха вăл хăй хĕрĕх пиллĕк тултарнине çавра сĕтел хушшинче тулли кил-йышпа - юратнă мăшăрĕпе Нинăпа тата ывăлĕпе, хĕрĕпе пĕрле кĕтсе илнĕччĕ. Шăпа пỹрни темелле пулĕ çакна: июлĕн хĕвел шевлиллĕ кунĕнче ирттернĕ аллă çулхи юбилей уявĕнче чунтан савнă арăмĕ Вадимпа юнашар киленсе лараймарĕ, юратнă упăшкине вăрăм ĕмĕр сунса, шампань эрехĕн тулли черккине пушатаймарĕ. Илемлĕ пултарулăхăн вĕç-хĕррисĕр анинче нумай çул хушши тухăçлă ĕçлесе пынăшăн Вадима Раççей культура министерствин Хисеп грамотине парса чысланине те кураймарĕ Нина. Ăна, çирĕм çул ытла райпо правленийĕн тĕп бухгалтерĕн тивĕçне тỹрĕ кăмăлпа пурнăçласа пынăскере, хĕллехи сивĕ каç ĕçрен таврăнаканскере, виçĕ çул каялла çуран çỹрекенсем çул урлă каçмалли ятарлă вырăнта, çывăхри тăкăрлăкран кĕтмен çĕртен "Жигулипе" çаврăнса тухнă ỹсĕр водитель хыттăн çапса хăварнă. Нина, йывăр сурансем илнĕскер, юратнă мăшăрне тата ытарайми хĕрĕпе ывăлне тăлăха хăварса, пĕр талăкран район больницинче пурнăçран ĕмĕрлĕхех уйрăлса кайрĕ...

Ресторанта хăйне чысласа ирттернĕ юбилей уявĕнчен хваттере таврăнсан - çитĕнсе çитнĕ ывăлĕпе хĕрĕ райцентр хĕрринчен пуçланакан улăх-çаран тата уй-хир илемĕпе киленсе çỹреме шутларĕç - Вадим Долинин шкафран çемье альбомне илсе кресло çине ларчĕ те, сăн ỹкерчĕксене пĕрин хыççăн теприне пăхкалама пуçларĕ. Тĕрлĕ çулсенче ỹкерттернĕ сăн ỹкерчĕксене тимлĕн сăнаса тишкернĕ май, çирĕм пилĕк çул хушшинче пулса иртнĕ уйрăм самантсем ун куçĕ умне кинофильмри кадрсем евĕр тухса тăчĕç...

Ульяновск облаçĕнчи культура керменĕнче ĕçлекенсем ăна, тăрăхларах сăн-питлĕ, яштака пỹ-силлĕ çамрăк специалиста, ăшшăн кĕтсе илчĕç, штатри виçĕ методистран Вадима асли пулма çирĕплетрĕç.