Юлашки вăхăтра Патăрьел муниципалитет округĕнче мотоциклистсем йĕркене пăснă тĕслĕхсем йышланчĕç. Çул çитмен ачасем водитель удостоверенийĕсĕр руль умне ларса ярăнма тухнисем те час-часах пулаççĕ. Çакна иртнĕ эрнере республика шайĕнче йĕркеленĕ "Мотоцикл" операци те кăтартса пачĕ.

Рейд вăхăтĕнче РФ ШĔМĕн муниципалитетсем хушшинчи "Батыревский" уйрăмĕн ГИБДД сотрудникĕсем çул-йĕр правилине пăхăнмасăр мотоциклпа çула тухнă пилĕк тĕслĕхе тупса палăртнă. Вĕсем хушшинче виççĕшĕ çул çитмен ачасем, çакскерсем водитель удостоверенийĕсĕр руль умне ларса ярăнса çỹренĕ. Пĕр водительпе пассажир вара пуçа тăхăнмалли каскăсăр теветкеленсе тухнă.

Тĕрĕслев вăхăтĕнче инспекторсем икĕ мототранспорта штраф стоянкине леçнĕ, çул çитмен виçĕ ача ячĕпе рапорт çырнă. Çывăх вăхăтра вĕсене Патăрьел муниципалитет округĕн администрацийĕ çумĕнчи çул çитмен ачасемпе тимлекен комиссинче пăхса тухĕç, ашшĕ-амăшне ачисене кирлĕ пек пăхса çитерейменшĕн, воспитани паманшăн РФ КоАПăн 5.35 статйипе айăплĕç.

Мотоцикл та, ытти транспорт хатĕрĕ пекех такăр çула çеç мар, йĕркене, саккуна пăхăннине юратать. Теветкеллĕх синкерлĕ те вĕçленме пултарать. Çавăнпа та çула тухакан кашни водитель йĕркене çирĕп пăхăнмалла. Сăмах май каласан, августăн 11-13-мĕшĕсенче "Ỹсĕр водитель" республика шайĕнчи операци иртет.

Алексей МАЛЬЦЕВ, РФ ШĔМĕн муниципалитетсем хушшинчи "Батыревский" уйрăмĕн ГИБДД пайĕн начальникĕ