Августăн 5-мĕшĕнче Федор Ушаков адмирала асра тытнă май Аслă Чемен тата Тури Чакă ялĕсен хушшинче çакăнта пурăнакан тинĕс çар флочĕн ветеранĕсене сума суса палăк уçрĕç.

Ырă пуçарупа тухнисене чылайăшĕ укçа-тенкĕпе пулăшрĕ. Патриотла юхăмран ватти те, кĕçĕнни те юлмарĕ. Ялти вăтам шкулта вĕренекен Родион Михайлов пуринчен çамрăкки пулсан та ир пуçласа каçчен çакăнта ĕçлерĕ. Флот ветеранĕсем ăна уйрăммăн тав турĕç. Вăхăтĕнче моряк пулнă Андрей Кузьмин, Борис Лысов, Владимир Фролов пысăк хастарлăх кăтартрĕç. Вĕсене "Морское братство-Союз моряков" обществăлла организаци "Тинĕс çар флотне парăннăшăн" медальпе наградăларĕ. Ытти хастарсем Тав хучĕпе моряксен майкине тивĕçрĕç.

Улатăр тата Пăрачкав епархийĕн III округĕн благочиннăйĕ, çветтуй Троица ячĕллĕ Туçа чиркĕвĕн настоятелĕ Николай Марков протоиерей палăка сăвапларĕ. Йăлана кĕнĕ йĕркепе флот ветеранĕ Владимир Фролов шампански кĕленчине палăк якорьне çапса çĕмĕрчĕ. Тинĕс çар флочĕн ялавĕсене çĕклерĕç.

Чăваш Республикин Патшалăх Канашĕн депутачĕ Валерий Антонов, Патăрьел тата Шăмăршă районĕсен çар комиссарĕ Вячеслав Илюткин, флот ветеранĕсен обществăлла организацийĕн канашĕн председателĕ Анатолий Казенов тата ытти хăнасем тухса калаçрĕç, хастарсене чысларĕç.

Пĕчĕк концерт пулчĕ. Моряксен юррипе "Яблочко" ташă уйрăмах кăмăла уçрĕç.

Уява Людмила Ежова библиотекарь ертсе пычĕ.

Альбина КАПИТОНОВА