Кăçал муниципалитет округĕнче кĕрхи культурăсене 5500 гектар акма палăртнă. Августăн 15-мĕшĕнче "Куснар" хуçалăх Юхмапа Пăла тăрăхĕнче ку ĕçе пĕрремĕш пуçăнчĕ. Туллăн "марафон" сортне никĕсе хываççĕ. Яваплă ĕçе Александр Шайдуков механизатора шаннă. Ăна Андрей Абзыков сеяльщик пулăшать. Вăрлăха кĕлетрен Геннадий Бородкин тракторпа турттарать.

- Кĕрхисене кĕл çине пулсан та акмалла тенине асра тытса нỹр сахаллине пăхмасăрах никĕсе хывма пуçларăмăр. Вăл пирĕн хуçалăхра 550 гектар йышăнмалла. Тулă çитĕнекен лаптăкра маларах нумай çул ỹсекен курăк ỹснĕ. Ăна Геннадий Филиппов, Анатолий Степанов механизаторсем пăсрĕç, тăпрана кăпкалатрĕç. Александр Кротов культиваци турĕ. Анана минераллă удобрени те пĕр гектар пуçне 200 килограмм сапса пулăхлатнă, - терĕ çĕр ĕç фирмин Первомайскинчи уйрăмĕн ертỹçи Александр Ахмеев.

Ольга ПАВЛОВА