Муниципалитет округĕнче çулленех "Ачасемшĕн, ачалăх ячĕпе" ыр кăмăллăх марафонĕ ирттереççĕ. Унта пухăннă укçа-тенкĕ вара вырăнтах юлать. Ăна тĕллевлĕ усă кураççĕ. Акă кăçалхин пĕр пайне вĕренỹ çуртне çỹрекен 25 ача валли шкул форми туянма ячĕç.

- Ачасем çĕнĕ вĕренỹ çулне чăтăмсăррăн кĕтеççĕ, - терĕ муниципалитет округĕн администрацийĕн вĕрентỹ, çамрăксен политики, физкультура тата спорт управленийĕн начальникĕ Ирина Рубцова шкул тумĕсене парнеленĕ май. - Ырă кăмăл кỹрекенсен укçи-тенкипе туяннă çĕнĕ тум-тир вĕсене тăрăшса вĕренме хавхалантартăр. Çитĕнекен ăрăвăн хастарлăхĕ ỹссе пытăр.

Çавăн пекех Ирина Петровна ачасене çул çинче асăрхануллă пулмаллине, шыва кĕме аслисемсĕр каймалла маррине тепĕр хут аса илтерчĕ. Çуллахи каникулăн юлашки кунĕсенче те ачасене аслисем тивĕçлĕ кану йĕркелесе парассине пĕлтерчĕ.

Парнешĕн кашнийĕ савăнчĕ. Ачасен сăнĕ-пичĕ çуталчĕ. Çак ятпа вĕсене халăха социллă пулăшупа тивĕçтерекен центр директорĕн ĕçĕсене пурнăçлакан Наталия Федоськина, администрацин опекăпа попечительство ĕçĕ-хĕлне йĕркелесе пыракан сектор заведующийĕ Татьяна Чылыкова, çул çитмен ачасен ĕçĕпе тимлекен тата вĕсен прависене хỹтĕлекен секторăн тĕп специалист эксперчĕ Лариса Комиссарова тата ыттисем те саламларĕç.

Хаклав

Валентина ПЕТРОВА, Еншик ялĕ:

- Сергей ывăлăм кăçал пĕрремĕш класа каять. Ăна та тивĕçрĕ шкул форми. Ачасене çакнашкал хавхалантарни савăнтарать. Çавăншăн ыр кăмăллăх марафонне хутшăнса хăйсен тỹпине хывнă кашни çыннах тав тăвасшăн.

Альбина АСТРАХАНЦЕВА