- Ялта кам та пулин ĕç тупса парасса кĕтсе лараймастăн, май пур таран хамăрăн тăрăшмалла, - тет Ишлĕри Елена Краснова. Елена Егоровна фермер хуçалăхĕ йĕркеленĕ, çавăн пекех вăл хăй тĕллĕн ĕçлекенсен шутĕнче те тăрать. Хуçалăхăн 100 гектара яхăн çĕр, унта тырă, нумай çул ỹсекен курăк ỹстереççĕ, çав шутах выльăхсене кĕтĕве кăлармалли ятарлă лапам та кĕрет. Лаптăка пусă çаврăнăшне кĕртиччен нумай тар тăкма тивнĕ кил хуçин Вячеслав Олеговичăн. 50 гектарĕнче çынран та çỹллĕрех йывăçсем кашласа ларнă. Вĕсене касса, тымарĕсене кăкласа акма юрăхлă çĕр тума çăмăл пулман, паллах. Куç хăрать те алă тăвать тесе аслисем ахальтен каламаççĕ çав. Пĕрлехи вăйпа йывăрлăхсене çĕнтернĕ-çĕнтернех.

Çĕрпе усă курма Красновсен техника çителĕклĕ: МТЗ-82 трактор, плуг, косилка, ворошилка, культиватор, пĕрчĕллĕ культурăна алласа тасатакан хатĕр туяннă. Тырра пухса кĕртме комбайн та пур. Утта хĕл каçарма, тырра упрама ангар тунă.

Хăйсем туса илнĕ продукцие выльăхсем урлă кăлараççĕ. Витере вăкăрсем, 60 пуçа яхăн сурăх тăраççĕ.

- Массăллă информаци хатĕрĕсенче, социаллă сетьре хушма хуçалăха аталантарма паракан патшалăх пулăшăвĕ пирки вуласа пĕлтĕмĕр, Ишлĕри территори уйрăмĕн специалисчĕсем те ăнлантарса пачĕç. Çакăн хыççăн хăй тĕллĕн ĕçлекен пек регистрацилентĕм. Патшалăхран 350 пин тенкĕ илме тивĕçрĕм. Вăл укçапа тăпрана кăпкалатмалли БДТ агрегат тата икĕ диск туянтăмăр, - тет сăмаха малалла тăсса Елена Егоровна.

Красновсем хирти ĕçсене те, выльăхĕсене пăхассине те ытларах хăйсен вăйĕпе пурнăçлаççĕ. Вячеслав Олеговича çăмăл автомашинăпа çỹренине кăна мар, трактор рулĕ умĕнче те курма пулать. Хусанта вĕренекен икĕ тата шкула çỹрекен хĕрĕсем те хуçалăхра пулăшаççĕ. Пĕрремĕш класа кайма хатĕрленекен ывăлĕ те ашшĕ-амăшĕпе юнашарах.

Ольга БЕЛЬДЕКОВА