Етĕрне районĕнчи "Совхозный" поселок ипподромĕнче Чăваш Республикин кубокне çĕнсе илессишĕн урхамахсен ăмăртăвĕ иртрĕ. Унта чи лайăх 20 юртă лаша хутшăнчĕ. Вĕсем Мускав, Ульяновск облаçĕсенчен, Тутарстан Республикинчен килнĕ. Тупăшăва тĕнче шайĕнчи ăмăртура палăрнă Эдуардпа Геннадий Большаковсем, Владимир Пупко, Александр Несяев хутшăнни пысăк пĕлтерĕшлĕ.

Чăваш Республикин урхамахĕсем вара çĕнтерỹпе савăнтарчĕç.

Мĕн пурĕ 7 чупу иртрĕ. Виççĕмĕшĕнче Тикеш ялĕнчи пĕрремĕш категориллĕ юланутçă Алексей Краснов "Победитель" урхамахĕпе ипподром реккордне çĕнетрĕ. 1600 метрлă дистанцири вăхăчĕ 2 минут та 3 çеккунт. Урхамах "Исток" çĕр ĕç фирмин чысне хỹтĕлерĕ.

Малалла финалти пăхăр, кĕмĕл тата ылтăн чупусем иртрĕç.

2400 метрлă дистанцире Тикеш ялĕнче çуралса ỹснĕ, халĕ Çĕнĕ Шупашкарти лаша спорчĕн шкулĕнче директор пулса ĕçлекен Валерий Краснов мастер наездник "ЗОВ ПРЕДКОВ РМ" урхамахĕпе пĕрремĕш вырăн йышăнчĕ. 500 пин тенке тивĕçрĕ. Иккĕмĕш вырăнта "Уникс" урхамах. Хуçи - Тикешри Алексей Краснов. Унпа Мускав облаçĕнчи Александр Несяев чупрĕ. Иккĕмĕш вырăншăн 250 пин тенке тивĕçрĕ. Тăваттăмĕш вырăнта вара - "Победитель" урхамах. Алексей Краснов 100 пин тенкĕ çĕнсе илчĕ.

Николай КРАСНОВ