Композитор, чăваш музыка фольклорне пухаканĕ, чăваш халăх музыка инструменчĕсене тăваканĕ тата тĕпчекенĕ, Чăваш Республикин культурăн тава тивĕçлĕ ĕçченĕ Николай Лазаревич Эриванов (20.08.1938) 85 çул каялла Вăрманхĕрри Шăхалĕнче çуралнă.

Вăл Ф.П.Павлов ячĕллĕ Шупашкарти музыка училищинчен вĕренсе тухнă. Тĕрлĕ çулта Мускавра чăваш халăх хорĕн баянист-концертмейстерĕнче, Комсомольскинчи ача-пăча шкулĕн директорĕнче, республикăри халăх ăсталăх çурчĕн методистĕнче, Çĕнĕ Шупашкарти химиксен культура çурчĕ çумĕнчи "Сăрнай" халăх фольклор ансамблĕн ертỹçинче ĕçленĕ. Унăн 100 ытла юрри "Юрламасăр чун чăтмасть", "Çĕмĕрт çеçкере" сборниксене кĕнĕ.

("Çулталăк кĕнекинчен")