Чăваш Республикин Пуçлăхĕн 2023 çулхи августăн 15-мĕшĕнче кăларнă 599-рг хушăвĕпе килĕшỹллĕн республикăри чи лайăх ĕçлекен 20 вĕренỹ учрежденийĕ Чăваш Ен Пуçлăхĕн грантне тивĕçнĕ. Вĕсене 500-шер пин тенкĕ парса хавхалантарĕç. Палăртма кăмăллă, малтисен йышне Патăрьелĕнчи иккĕмĕш вăтам шкул та кĕнĕ.

 Çавăн пекех Чăваш Республикин Пуçлăхĕн 2023 çулхи августăн 15-че кăларнă тепĕр хушăвĕпе Раççĕй шайĕнчи олимпиадăсенче мала тухнă ачасене вĕрентнĕ педагогсене укçан хавхалантарма йышăннă. Чыслава тивĕçнисен хушшинче Митта Ваçлей ячĕллĕ Первомайскинчи вăтам шкулти физкультура учителĕ Владимир Матюшкин та пур. Пултаруллă педагога 150 пин тенкĕ парса хавхалантарма йышăннă. Сăмах май каласан, Владимир Васильевич çак чыса пĕр хутчен çеç мар тивĕçнĕ.

 (Хамăр корр.).