Юхмапа Пăла тăрăхĕнче вырма каçалăкĕ хупăнса пырать.

 Пĕрчĕллĕ тата пăрçа йышши культурăсем кăçал 16608 гектарта çитĕнчĕç, августăн 24-мĕшĕ тĕлне 16107 гектар (96 процент) пушаннă. Ĕнерхи куна йĕтемме 54000 тонна ытла тырă кĕнĕ. Çанталăк типĕ те шăрăх тăни тухăçра аванах сисĕнет. Пĕр гектартан вăтамран 34,2 центнер тухать. Иртнĕ çул 35,7 центнерпа танлашнăччĕ. "Корма", "Красное Знамя", "Исток", "Батыревский", "Куснар" хуçалăхсен, "Авангард" пĕрлешĕвĕн "Патăрьел беконĕ" филиалăн, К. Салихов, Ф. Чабатов, А. Петров, Э. Шайкина фермер хуçалăхĕсен вара вăтам кăтартуран пысăкрах.

 Ял хуçалăхĕнче харăсах темиçе ĕç тума тивет. Çуллан шутлă кунĕсем васкама хушаççĕ. Пушаннă хирсене çийĕнчех сухалаççĕ. Кĕрхи çĕртме 11530 гектарта пурнăçланă.

Кĕрхи культурăсене кăçал 5500 гектар акма палăртнă. Çĕр хатĕрлесе çитернĕ. "Куснар" çĕр ĕç фирминче кĕрхисене никĕсе хываççĕ, "Батыревский" пĕрлешỹре ĕçе вĕçленĕ. Хальлĕхе пурĕ 770 гектар никĕсе хывнă. Майĕпен ытти хуçалăхсем те хушăнса пыраççĕ.

Выльăхран продукци илес тесен пахалăхлă та сĕтеклĕ апат çитермеллине кашнийĕ пĕлет. Ял хуçалăх предприятийĕсемпе фермер хуçалăхĕсем хĕле валли сенаж 27210 тонна (палăртнинчен икĕ процент ытларах), утă 13070 тонна (1,3 процент нумайрах) хатĕрленĕ. Ку ĕç малалла пырать. "Труд" хуçалăх округра кăна мар, республикăра та куккурус вырма пĕрремĕш тухрĕ. Пĕтĕмĕшле вара ку культурăна 1067 гектартан пухса илмелле.

Патăрьелсен бренчĕ - сухан-çевок - 580 гектарта çитĕннĕ. Ăна пуçтарса илесси те майĕпен вĕçленсе пырать: 560 гектар пушаннă. Кăçал чылай фермер ĕçе механизацилеме тăрăшни сисĕнет. Вăрлăх сухана ятарлă агрегатпа кăларчĕç, комбайнпа пухаççĕ. Вăтам тухăç пĕр гектартан вăтамран 120 центнер тухать. Уйрăм çынсем çĕр улмие те кăларма пикенчĕç.

Ольга ПАВЛОВА