Пĕлỹ çурчĕсене комисси пăхса тухнă ĕнтĕ. Черет шкул автобусĕсене çитрĕ. Ачасене турттармалли транспорт хатĕрĕн пур енчен те юсавлă пулмалла, саккун ыйтнисене пăхăнмалла. Пирĕн муниципалитет округĕнче 22 шкул автобусĕ çỹрет. Вĕсенчен 7-шĕ - çĕнĕскерсем. Автотранспорт 36 маршрутпа 850 ачана вĕренỹ занятийĕсене турттарĕ.

Ытларикун, августăн 22-мĕшĕнче, шкул автобусĕсем муниципалитет округĕн администрацийĕ умне пухăнчĕç. Тĕрĕслев пуçланиччен Патăрьел муниципалитет округĕн администрацийĕн пуçлăхĕн çумĕ - строительство, çул-йĕр тата пурăнмалли коммуналлă хуçалăх пайĕн начальникĕ Равиль Ямалетдинов, вĕрентỹ, çамрăксен политики, физкультура тата спорт управленийĕн начальникĕ Ирина Рубцова, РФ ШĔМĕн муниципалитетсем хушшинчи "Батыревский" уйрăмĕн ГИБДД пайĕн начальникĕ Алексей Мальцев, пушар надзорĕн начальникĕ Андрей Тукмаков тата ыттисем сăмах илчĕç. Вĕсем шкул ертỹçисене, автобус водителĕсене ку вĕренỹ çулне те, иртнинчи пекех пĕр пăтăрмахсăр ирттерсе яма ăнăçу сунчĕç.

РФ ШĔМĕн муниципалитетсем хушшинчи "Батыревский" уйрăмĕн ГИБДД пайĕн, Чăваш Республикинчи патшалăх çул-йĕр надзорĕн территори пайĕн тата прокуратура ĕçченĕсем техникăна тĕрĕслерĕç. Специалистсем тахографсем ĕçленине, техника тĕрĕслевĕ витĕр тухнине, хăрушсăрлăх пиçиххийĕсем пуррине, тормоз тытнине, ыттисене те тишкерчĕç.

Комисси шкул автобусĕсем юсавлине палăртрĕ. Рейса тухас умĕн водительсене тĕп больница ĕçченĕсем тĕрĕслесе тăрĕç. Пур автобус та ГЛОНАССпа çыхăннă. Тахографсем пур.

 Альбина АСТРАХАНЦЕВА