Район хаçатĕнче почтальонсем кирлĕ, çитмеççĕ текен пĕлтерỹсем вĕçĕмсĕр пичетленеççĕ. Сăлтавĕ паллă ĕнтĕ. Вĕсем çурма хăватпа ĕçлеççĕ тесе тỹлевне палăрмаллах чакарнă. Тĕрĕсех çырать Зинаида Кондратьева почтальонсен ĕçĕ пирки. Çăмăл мар вĕсене. Унччен те, халĕте çавах. Мĕншĕн тесен почтальонсем кĕрхи-çурхи пылчăкра та, хĕл варринчи çил-тăманра та юр ашса килĕрен-киле, урамран урама кашни çын патне хаçат-журнал валеçнĕ. Халĕ те çавах. Пĕрлех газпа усă курнăшăн, электричество çутнăшăн, çỹп-çап тăкнăшăн тỹлемелли квитанцисене валеçсе çỹреççĕ. Унсăр пуçне апат-çимĕç, хуçалăхра кирлĕ тĕрлĕ тавар йăтса халăха тивĕçтереççĕ. Пенси укçи параççĕ. Анчах хăйсен уйăхра ĕçлесе илнĕ 6 пин тенкĕпе мĕнле пурăнмалла? Çемьене тытса тăмалла. Ачисене ỹстермелле. Хăйсем валеçекен квитанцисемпе татăлмалла.

Хăш-пĕр почтальонсем ют ялти почта уйрăмĕсене 4-5 çухрăма хаçат-журнал илме çỹреççĕ. Вĕсем ял халăхне кирлех. Ватăсем вĕсене куллен кĕтеççĕ. Вĕсене почтальонсем ытти пулăшупа та тивĕçтереççĕ.

Тỹлевне чи пĕчĕк ĕç укçи шайĕ чухлĕ те хăпартма май çук-ши вара?

Александр ФРОЛОВ, Туçа ялĕ