Етĕрне муниципалитет округĕнче августăн 25-мĕшĕнче "Фермерсен слечĕ-2023" иртнĕ. Унта Патăрьел муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕл пайĕн начальникĕ Виктор Львов ертсе пыракан делегаци хутшăннă.

Слетра агробизнесри пĕчĕк тата вăтам предпринимательлĕхре тăрăшакан 200 ытла çын пулнă. Мероприятинче ял хуçалăх отрасльне аталантарассипе, туса илнĕ продукцие сутассипе, патшалăх пулăшăвĕ пирки çавра сĕтелсем, пĕр-пĕрин опычĕпе паллашма ятарлă лапамсем, суту-илỹ сечĕсене тухма май паракан регионти агрегатор-поставщиксемпе калаçусем, Чăваш Ен Правительствин ертỹçисемпе дискуссисем йĕркеленĕ.

Çак кун "Халăх Фермерĕ" тата "Чăваш Енри халăх Фермерĕ" ассоциацисем пĕрле ĕçлеме килĕшỹ çырнă. Сăмах май, Раççейри пĕрлĕхе 24 регионти уйрăм тата отрасльти икĕ Союз кĕреççĕ. Чăваш Республикинчи уйрăма ертсе пыма пирĕн ентеше Леонид Кузнецова шаннă. Леонид Валерьевич округсенче те вырăнти агробизнесменсен пуçарăвĕсене, сĕнĕвĕсене шута илекен ятарлă çын пулассине пĕлтернĕ. Çапла вара республикăри фермерсен пĕрлĕхĕсем пĕр вăя пĕрлешеççĕ.

Мероприятинче Чăваш Енри чи лайăх 100 фермера та палăртнă. Кăçал ăна пĕрремĕш хут йĕркеленĕ. Шута илнĕ чухне усă куракан çĕр лаптăкне, выльăх-чĕрлĕх тата чăх-чĕп, техника шутне, шалăва тата ĕçлекенсен йышне, рентабельлĕхе, парăм çуккине пăхнă. Юхмапа Пăла тăрăхĕнчи 18 фермер çак йыша кĕме пултарнă. Камиль Салихов (7-мĕш вырăнта), Решит Санзяпов (8), Серина Халитова (10) малти 10 фермер хуçалăх шутĕнче.

 (Хамăр корр.)